Qazaqstan-Ózbekstan jylnamasynyń jańa paraǵy ashyldy

ASTANA. QazAqparat - Qazaqstan Ózbekstanmen kópjosparly yntymaqtastyqty odan ári nyǵaıtýǵa nıetti. Bul týraly búgin Aqordada birqatar shetel Elshisinen senim gramotasyn qabyldaǵan Elbasy Nursultan Nazarbaev aıtty, dep habarlaıdy QazAqparat.

«Ózbekstan Respýblıkasymen bizdi birneshe ǵasyrlyq mádenıetter men dástúrler dostyǵynyń dánekeri baılanystyryp tur. Qazaqstandyq-ózbekstandyq qarym-qatynastyń odan ary damýyna Ózbekstannyń qurmetti Prezıdenti Shavkat Mırzıeev úlken úles qosýda. Ol kelgennen keıin biz Astana men Tashkent yntymaqtastyǵynyń jańa jylnamasyn ashtyq. Sonymen qatar Ortalyq Azııa elderiniń yntymaqtastyǵyn nyǵaıtýda aıtarlyqtaı progreske qol jetkizdik», - dedi Elbasy.

Memleket basshysy aǵymdaǵy jyly oryn alǵan ózara saparlar, sonymen birge túrli halyqaralyq alańdardaǵy qarqyndy baılanystar saıası rýhty aıtarlyqtaı nyǵaıta túskendigin basa aıtty.

«Alǵash ret ózara saýda ósimin 30 paıyzdan astamǵa qamtamasyz ettik. Aǵymdaǵy jyly Ózbekstannyń Qazaqstandaǵy jylynyń bastalýy, kelesi jyly baýyrlas Ózbekstanda Qazaqstan jylyn ótkizý jańa jańalyqtardyń mejesine aınalady jáne bizdiń yntymaqtastyǵymyzdyń barlyq spektrine tyń serpin beredi. Qazaqstan Ózbekstanmen kópjosparly yntymaqtastyqty odan ary nyǵaıtýǵa nıetti», - dedi Nursultan Nazarbaev.

Qazaqstan Prezıdentine senim gramotasyn tapsyrǵannan keıin BAQ ókilderimen brıfıng ótkizgen ózbek Elshisi Saıdıkram Nııazhodjaev Ózbekstan úshin Qazaqstan ýaqyt synynan ótken strategııalyq seriktes sanalatyndyǵyn aıryqsha atap ótti. 

«Bul rette qysqa ǵana ýaqyt aralyǵynda ekijaqty qarym-qatynastarymyzdyń jańa paraǵyn ashqan eki Prezıdenttiń jeke ózara qarym-qatynasyn atap ótken jón. Tek ótken jyly ǵana joǵary deńgeıdegi 6, sondaı-aq mınıstrlikter men vedomstvolar deńgeıinde 20-dan astam kezdesýler ótkizildi», - dedi ol.

Ózbekstan Elshisi eki eldiń arasyndaǵy barlyq saladaǵy yntymaqtastyqty odan ary tereńdetýge kúsh salatyndyǵyn basa aıtty. Sonymen qatar ol Ózbekstannyń Qazaqstandaǵy kúnderi aıasynda 200-den astam shara ótetindigin, Tashkent-Almaty-Tashkent jáne Almaty-Tashkent-Almaty jańa avtobýs baǵyttarynyń ashylatyndyǵyn eske saldy.

Aıta keteıik, búgin Aqordada Qazaqstan Prezıdenti Nursultan Nazarbaev birqatar shet memleketterdiń Tótenshe jáne Ókiletti Elshilerinen senim gramotalaryn qabyldady.  Olardyń qatarynda Ózbekstannyń Qazaqstandaǵy Tótenshe jáne Ókiletti Elshisi Elshisi Saıdıkram Nııazhodjaev te boldy.

Saltanatty shara barysynda Elshilerge sóz arnaǵan Nursultan Nazarbaev aǵymdaǵy jyly elimizde ótetin mańyzdy oqıǵalar týraly aıtty.