Qazaqstan, Ózbekstan jáne Qyrǵyzstan trıatlonnan Ortalyqazııalyq qaýymdastyǵyn qurdy

ASTANA. QazAqparat - Qazaqstan, Ózbekstan jáne Qyrǵyzstan Respýblıkalarynyń ulttyq trıatlon federatsııalary birlesip Ortalyqazııalyq trıatlon qaýymdastyǵyn (Central Asian Triathlon Association - CATA) qurdy. Tıisti memorandýmǵa Astanada qol qoıyldy, dep habarlaıdy QazAqparat.

QR Ulttyq olımpıadalyq komıtettiń aqparatyna sáıkes, búgin «Nazarbaev Ýnıversıtetiniń» qabyrǵasynda SATA-nyń alǵash otyrysy ótti. Onda qatysýshylar SATA Konstıtýtsııasyn qabyldady, yntymaqtastyq jáne ózara kelisim týraly memorandýmǵa qol qoıyp, Atqarýshy komıtet múshelerin saılady. Otyrys nátıjesinde qatysýshylar Ortalyq Azııa elderiniń terrıtorııasynda trıatlondy damytý jáne nasıhattaý, Azııalyq Trıatlon konfederatsııasynda (ASTC) biraýyzdan ortaq baǵdardy ustaný - SATA-nyń basty maqsaty bolady degen kelisimge keldi. Bul óz kezeginde - Ortalyq Azııa sportshylaryna ǵana emes, bapkerler men tehnıkalyq delegattarǵa da eshbir bógetsiz tájirıbe almasýǵa jol ashady. Sonymen qatar, SATA músheleri Búkilálemdik dopıngke qarsy agenttik (WADA) jáne Halyqaralyq trıatlon odaǵy (ITU) tyıym salǵan preparattardy paıdalanýmen tabandy túrde kúresýge ortaq kúsh salatyn boldy.

SATA basshysy retinde Almaty Triathlon Federation basshysy ári QTF vıtse-prezıdenti - Ǵalymjan Esenov biraýyzdan saılandy. Óziniń saılaýaldy sózinde Ǵalymjan Esenov SATA-nyń ónimdi jumys jasaýyna barlyq kúsh-jigerin salatynyn atap ótti.

Otyrys Qazaqstandyq trıatlon federatsııasynyń prezıdenti Kárim Másimovtiń tóraǵalyǵymen jáne Ózbekstan trıatlon federatsııasynyń bas hatshysy Leonıd Blohınniń, Qyrǵyz Respýblıkasy trıatlon federatsııasynyń prezıdenti jáne bas hatshysy Chyngyz Alkanov pen Elena Lyjına-Polchınkovalardyń qatysýymen ótti. Sonymen qatar, otyrys jumysyna QTF vıtse-prezıdenti Aıdyn Rahymbaev, QTF bas hatshysy Maksım Krıat, QTF atqarýshy dırektory Asyljan Dostııarov pen ATF qamqorshylyq keńesiniń múshesi Ýalıhan Ten qatysty.