Qazaqstan, Ózbekstan jáne Qyrǵyzstannyń fıtosanıtarııalyq qyzmetteri kúsh biriktirmek
ASTANA. KAZINFORM - Eýropalyq jáne Jerorta teńizi ósimdikterdi qorǵaý jáne karantın uıymynyń (ERRO) jumys tobynyń 55-otyrysy aıasynda QR AShM Agroónerkásiptik keshendegi memlekettik ınspektsııa komıteti tóraǵasynyń mindetin atqarýshy Saken Qanybekov Ózbekstan men Qyrǵyzstannyń fıtosanıtarııalyq qyzmetteri basshylarymen kezdesý ótkizdi.
Kezdesýdiń basty taqyryby – shegirtkege qarsy kúres sharalary boldy. Taraptar maýsymdyq zııankesterge qarsy tıimdi kúres júrgizý tájirıbesimen tanysty.
Kezdesý barysynda Locust.uz júıesi tanystyryldy. Bul – shegirtkeler jumyrtqa salǵan aýmaqtar men hımııalyq óńdeý júrgizilgen jerler týraly málimetter engiziletin elektrondy platforma. Júıe jaǵdaıdy durys baǵalaýǵa múmkindik beredi. Sonymen qatar, júıe GPS qurylǵylary arqyly arnaıy tehnıkanyń qozǵalysyn qadaǵalap otyrady. Bul shegirtkeniń keń aýmaqtarǵa taralýyna jol bermeı, jedel shara qoldanýǵa jaǵdaı jasaıdy.
Kelissózderdiń qorytyndysy boıynsha taraptar yntymaqtastyqty odan ári nyǵaıtý, halyqaralyq fıtosanıtarııalyq standarttardy engizý jáne aqparat almasýdy damytý jóninde ýaǵdalasty.
Taraptar shekara mańyndaǵy aımaqtarda shegirtkege qarsy kúres, fıtosanıtarııalyq jaǵdaı, zertteý nátıjeleri, zııandy aǵzalardyń taralýy jáne júrgizilip jatqan is-sharalar týraly jedel málimet almasýǵa erekshe nazar aýdaratyn bolady.
Sondaı-aq fıtosanıtarııalyq sertıfıkattar boıynsha tıimdi ári turaqty derekter almasýdy qamtamasyz etý maqsatynda aqparattyq júıelerdi biriktirý josparlanyp otyr.
Atalǵan yntymaqtastyq óńirdegi aýyl sharýashylyǵynyń qaýipsizdigin arttyrýǵa jáne qatysýshy elderdiń azyq-túlik qaýipsizdigin qamtamasyz etýge baǵyttalǵan.
Osyǵan deıin bıyl elimizde 23,7 mln gektar jerge aýyl sharýashylyǵy daqyldary egilgeni týraly jazdyq.