Qazaqstan, Ózbekstan jáne Qyrǵyzstan Syrdarııa ózeninde sý bólý tártibin bekitti
ASTANA. KAZINFORM — Qazaqstan, Ózbekstan jáne Qyrǵyzstan Tashkenttegi kezdesýde vegetatsııalyq kezeńge arnalǵan sý-energetıkalyq rejımderdi kelisti, dep habarlaıdy Energetıka mınıstrligi.
Tashkenttegi halyqaralyq energetıkalyq forým aıasynda Qazaqstan Respýblıkasynyń Energetıka mınıstri E.Aqkenjenov óńirlik yntymaqtastyqty nyǵaıtýǵa baǵyttalǵan birqatar mańyzdy kezdesý ótkizdi. Qazaqstannyń, Ózbekstannyń jáne Qyrǵyzstannyń energetıkalyq jáne sý resýrstaryna jetekshilik etetin mınıstrlerdiń josparly úshjaqty kezdesýi ótti. Onyń qorytyndysy boıynsha energetıkalyq obektiler jumysynyń kelisilgen rejımderin jáne aldaǵy vegetatsııalyq kezeńge Syrdarııa ózeni basseıninde sý bólý tártibin aıqyndaıtyn hattamaǵa qol qoıyldy.
Osy Hattamaǵa qol qoıý Sý resýrstaryn teńgerimdi paıdalanýdy jáne Ortalyq Azııanyń energııa júıeleriniń turaqty jumysyn qamtamasyz etýge baǵyttalǵan úsh eldiń turaqty yntymaqtastyǵy sheńberindegi mańyzdy qadam sanalady. Mundaı rejımderdi ár vegetatsııalyq kezeńge deıin talqylaý jáne kelisý elderdiń qazirgi gıdrologııalyq jaǵdaıyn jáne sý men energetıkalyq resýrstarǵa degen qajettilikterin eskerýge múmkindik beredi.
QR Energetıka mınıstri «Ózbekstannyń energetıkalyq aptalyǵy» (CAEx) kórmesiniń jumysyna qatysty. Onda qazaqstandyq kompanııalardyń stendterine nazar aýdaryp, olardyń salany damytýǵa jáne ınnovatsııalyq jobalardy iske asyrýǵa qosqan úlesin atap ótip, energetıka salasyndaǵy zamanaýı tehnologııalar men ázirlemelermen tanysty.
Sapar qorytyndysyna túsinikteme bergen QR Energetıka mınıstri Erlan Aqkenjenov:
— Sý-energetıka máseleleri boıynsha turaqty úshjaqty konsýltatsııalar men hattamalarǵa qol qoıý bizge ortaq resýrstardy basqarýǵa júıeli túrde jaqyndaýǵa múmkindik beredi. Vegetatsııalyq kezeńge arnalǵan rejımder boıynsha búgin qol jetkizilgen ýaǵdalastyqtar dáıekti birlesken jumystyń nátıjesi sanalady jáne barlyq qatysýshy eldiń múddelerin qamtamasyz etýge baǵyttalǵan. Sonymen qatar, biz energetıkadaǵy tehnologııalyq jańalyqtardy qadaǵalap, óndirýshilerimizge qoldaý kórsetýdi jalǵastyramyz. Bul sektordy jańǵyrtý jáne óńirlik áriptestigimizdi nyǵaıtý úshin mańyzdy, — dedi Erlan Aqkenjenov.
Kezdesý barysynda taraptar birqatar uzaq merzimdi strategııalyq joba boıynsha konsýltatsııalardyń barysyn talqylady. Atap aıtqanda, Qambar-Ata GES-1 qurylysy jónindegi Qazaqstan, Ózbekstan jáne Qyrǵyzstan arasyndaǵy kelissózder josparly túrde jalǵasyp jatqany jáne Ázerbaıjan, Qazaqstan men Ózbekstannyń qatysýymen júzege asyrylatyn Kaspıı energetıkalyq dálizin qurý jobasy boıynsha jumys jalǵasyp jatqany atap ótildi.
Qazaqstandyq delegatsııanyń sapary men ótkizilgen kezdesýler óńirlik energetıkalyq dıalogty odan ári damytýǵa jáne Ortalyq Azııa elderiniń praktıkalyq ózara is-qımylyna yqpal etedi.
Buǵan deıin BQO-da energetıkalyq jáne kommýnaldyq salada 6 jobany júzege asyrý kózdelip otyrǵany belgili boldy.