Qazaqstan, Ózbekstan jáne Ázerbaıjan birlesip, Kaspıı túbimen kabel tartady
TAShKENT. KAZINFORM – Búgin Tashkent qalasynda Qazaqstan, Ózbekstan jáne Ázerbaıjannyń energetıka mınıstrleri Kaspıı teńiziniń astymen elektr kabelin tartý jobasyn iske asyrý memorandýmyna qol qoıdy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Qujatqa saı, atalǵan úsh memleket kún, jel jáne sý elektr stantsııasy sııaqty ekologııalyq taza kózderden óndirilgen elektr energııasyn ózge elderge eksporttaıdy. Ol úshin aldymen Kaspıı teńiziniń astymen joǵary voltty kabel tartý josparlanyp otyr.
Bul rette QR Energetıka mınıstri Almasadam Sátqalıev buǵan deıin Kaspıı túbimen kabel ótkizý jobasyn iske asyrý maqsatynda tehnıkalyq tapsyrma ázirlengenin atap ótti.
«Tehnıkalyq tapsyrma sheńberinde halyqaralyq transmıssııalyq dálizderdi damytý jáne Eýroodaq elderine jasyl energııany satý úshin jobalyq bıznes-model ázirlenetin bolady. Joǵaryda aıtylǵandardyń negizinde úsh eldiń energetıka mınıstrlikteri ózderiniń energetıkalyq júıesin bir-birimen baılanystyrý jónindegi yntymaqtastyq memorandýmyna qol qoıdy», - dedi Almasadam Sátqalıev.
Vedomstvo basshysynyń aqparatyna sáıkes, qazirgi ýaqytta atalǵan jobany iske asyrý boıynsha bazalyq mehanızmder talqylanyp, barlyq taraptarmen kelisildi.
