Qazaqstan, Ózbekstan jáne Ázerbaıjan 2030 jyly Eýropaǵa «jasyl» energııa eksporttaıdy
TAShKENT. KAZINFORM — Qazaqstan Ózbekstan jáne Ázerbaıjanmen birlesip, Eýropaǵa ekologııalyq taza jolmen óndirilgen elektr energııasyn eksporttaýǵa daıyndalyp jatyr, dep habarlaıdy Kazinform agenttiginiń Tashkenttegi menshikti tilshisi.
Muny Tashkentte ótip jatqan «Uzbekistan Energy Forum» forýmyna qatysqan Ortalyq Azııa jasandy ıntellekt qaýymdastyǵynyń tóraǵasy Vladımır Norov málimdedi. Ol atap ótkendeı, aımaq elderiniń áleýeti mol jáne bilikti kadrlar jetkilikti.
— Qazaqstan, Ózbekstan jáne Ázerbaıjan 2030 jyldan bastap Eýropa elderine «jasyl» energııany eksporttaýǵa baǵyttalǵan birlesken joba aıasynda jumys istep jatyr. Aımaq memleketterdiń tehnologııalyq áleýeti artyp keledi. Máselen, 2018 jyly Ózbekstanda jan basyna shaqqandaǵy IT-qyzmetterdiń eksporty 1 dollar bolsa, osy kezeńde Qazaqstanda bul kórsetkish 3 dollar kóleminde boldy. Byltyr bizdiń elemizde IT-qyzmetterdiń eksporty 1 mlrd dollarǵa teńeldi. 2030 jylǵa qaraı onyń kólemin 5 mlrd dollarǵa jetkizý josparlanyp otyr, — dedi forýmda sóz alǵan Vladımır Norov.
Aıta keteıik, keshe osy forýmda sóz sóılegen QR Energetıka vıtse-mınıstri Baqytjan Іlııas Qazaqstan 2035 jylǵa deıin 26 gıgavatt kólemindegi jańa qýat kózderin iske qosýdy josparlap otyrǵanyn aıtty.
Eske salsaq, 9 sáýirde Senat «Qazaqstan, Ázerbaıjan jáne Ózbekstan arasyndaǵy jasyl energııany óndirý jáne berý salasyndaǵy strategııalyq áriptestik týraly kelisimdi ratıfıkatsııalaý týraly» Zańdy maquldady.
