Qazaqstan-Ózbekstan shekarasyndaǵy «Qazyǵurt» ótkizý pýnkti bir táýlikke jabylady

ASTANA. QazAqparat – Qazaqstan-Ózbekstan shekarasyndaǵy «Qazyǵurt» ótkizý pýnkti 6 qazan kúni bir táýlikke jabylady. Bul týraly Memlekettik kirister komıtetiniń baspasóz qyzmeti málim etti, dep habarlaıdy QazAqparat.

«QR Qarjy mınıstrliginiń Memlekettik kirister komıteti QR Ulttyq qaýipsizdik komıtetiniń Shekara qyzmetimen birlesip, 6 qazan saǵat 9:00-den 7 qazan saǵat 9:00-ge deıin «Qazyǵurt» ótkizý pýnkti (Qazaqstan) jáne «S. Nadjımov» (Ózbekstan) shektes ótkizý pýnkti «Ýztransgaz» AQ-nyń eki memlekettiń ótkizý pýnkteri arasynda ótetin gaz qubyrlarynda sý synaý jumystaryn júrgizýine baılanysty azamattar men avtokólik quraldary úshin jabyq bolatynyn habarlaıdy.

Qazaqstan-Ózbekstan shekarasyndaǵy basqa ótkizý pýnkteri shtattyq rejımde jumysyn jalǵastyrady.

Tasymaldaýshylardan jáne shekaradan ótýge nıet bildirgenderdiń barlyǵynan engizilgen shekteýlerdi eskere otyryp, óz marshrýttaryn aldyn ala josparlaýdy suraımyz», - delingen Komıtet habarlamasynda.