Qazaqstan-Ózbekstan shekarasyndaǵy eki ótkizý pýnkti táýlik boıy jumys isteıtin boldy
ASTANA. KAZINFORM – Búgin Senatta «QR Úkimeti men Ózbekstan Respýblıkasynyń Úkimeti arasyndaǵy Qazaqstan-Ózbekstan memlekettik shekarasy arqyly ótkizý pýnktteri týraly kelisimge 2006 jylǵy 4 qyrkúıektegi Hattamaǵa ózgerister men tolyqtyrý engizý týraly hattamany ratıfıkatsııalaý týraly» Zań maquldandy.
– Atalǵan hattamaǵa 2024 jylǵy 8 tamyzda Astana qalasynda qol qoıyldy. Bul qujat «Syrdarııa – Malık» jáne «Tselınnyı – Ok oltın» avtomobıl pýnktteriniń mártebesin ekijaqtydan halyqaralyq (kópjaqty) mártebege ózgertýdi kózdegen, – dedi baıandama jasaǵan Senat depýtaty Alısher Satvaldıev.
Sondaı-aq, jumys isteý tártibin «jaryq ýaqyttan» «táýlik boıyna» aýystyrylmaq.
– Budan basqa, hattamada joǵaryda atalǵan shekaralyq ótkelderdi «tek jeńil avtokólik úshin» shekteýli rejıminen júk-jolaýshy mártebesine kóshirý kózdeledi. Atap aıtqanda, «Tselınnyı – Ok oltın» ótkizý pýnkti jeńil jáne bos júk kólik quraldarynyń, sondaı-aq iri kólemdi jáne (nemese) aýyr salmaqty júkter men taýarlardyń júrýi úshin paıdalanylatyn bolady, – dedi Alısher Satvaldıev.
Al «Syrdarııa-Málik» ótkizý pýnkti tek jeńil jáne bos júk kólikteriniń júrýine paıdalanylmaq. Osy ótkizý pýnktinde júkter men taýarlardy kommertsııalyq maqsatta ótkizý kózdelmeıdi.
– Atalǵan shara ótkizý qabiletin arttyrýǵa, jolaýshylarǵa qolaıly jaǵdaı jasaýǵa jáne týrızmniń damýyna oń áserin tıgizedi. Atalǵan ózgerister, eki el arasyndaǵy kólik-tranzıttik qatynasty odan ári damytýǵa óz úlesin qosady dep esepteımiz. Sonymen qatar, QR Parlamenti Senaty turaqty komıtetterineń zańnyń tujyrymdasy boıynsha usynystar men eskertýler kelip túsken joq, – dedi Alısher Satvaldıev.
Aıta keteıik, buǵan deıin Qazaqstan men Ózbekstan aktıvterdi qaıtarý salasynda birlesken bastamalardy iske asyratynyn jazǵanbyz.
