Qazaqstan Ózbekstan naryǵyna jańa 64 taýar túrin shyǵarýǵa nıetti
«Premer-Mınıstrdiń orynbasary Roman Sklıardyń tóraǵalyǵymen Tashkentte Qazaqstan-Ózbekstan arasyndaǵy ózara saýda aınalymyn arttyrý jáne yntymaqtastyqty keńeıtý týraly kezdesý ótkizdik. Biz úshin Ózbekstan aımaqtaǵy negizgi saýda seriktesi. Aǵymdaǵy jyly ózara taýar aınalymyn 5 mlrd dollarǵa deıin jetkizýdi josparlaǵan bolatynbyz. Degenmen, pandemııaǵa baılanysty bul kórsetkishke qol jetkizý qıyn. 9 aıda eki el arasyndaǵy saýda aınalymy 16,5%-ǵa tómendedi. Bul salada Qazaqstan eksporty az kólemde zardap shekti, al Ózbekstan ımporty 40%-ǵa tómendedi.
Kelissózder barysynda Qazaqstan tarapy Ózbekstan naryǵyna jańa 64 taýar túrin shyǵarý týraly usynys bildirdi. Olar ártúrli qubyrlar, metall prokaty, avtomobılder, hımııa jáne munaı-hımııa ónimderi, mashına jasaý, farmatsevtıka, sondaı-aq tamaq ónerkásibi salasyndaǵy taýarlar. Bul baǵyttaǵy jumystardyń júıeli damýyna ótken jyly Tashkentte ashylǵan «KazakhExport» keńsesi kómektesedi dep senemin», - dep atap ótken QR Saýda jáne ıntegratsııa mınıstri Baqyt Sultanov. Mınıstrdiń málimdeýinshe, «KazakhExport» kompanııasy óziniń saqtandyrý quqyǵyn paıdalana otyryp, qazaqstandyq taýarlardy satyp alý úshin jergilikti bankterden eksportqa qajetti qarjy ala alady.
«Kezdesý aıasynda «KazakhExport» pen ózbekstandyq «Kıshlok kýrılısh bank» arasynda 3 mln dollarǵa deıin saýda operatsııalaryn qarjylandyrýdy kózdeıtin kelisimge qol qoıyldy.
«Biraq biz tek saýda jasap qana qoımaı, birlese syrtqy naryqtarǵa shyǵý joldaryn da qarastyramyz. Bul úshin eki el Halyqaralyq saýda-ekonomıkalyq yntymaqtastyq ortalyǵyn qurýǵa bastamashy boldy. Degenmen, ortalyqtyń jumysy bastalǵanǵa deıin biz onyń keıbir elementterin shekaralyq kóterme-taratý ortalyqtarynan synaqtan ótkizýdi usynamyz. Halyqaralyq saýda-ekonomıkalyq yntymaqtastyq ortalyǵy iske qosylǵan sátte taýarlar qozǵalysynyń barlyq tehnologııalyq shemasyn jasap, osal tustardy anyqtap, olardy tez arada túzete alamyz. Sondaı-aq, «jasyl dáliz» qaǵıdaty boıynsha taýarlardyń tranzıttik qozǵalysyn qamtamasyz etý úshin ótkizý beketterinde fıto-sanıtarııalyq baqylaý, kedendik rásimder men ózge de qajetti sharalar júrgizý júıesin damytý mańyzdy. Bul úshin barlyq shekara mańy qyzmetterinde HQKO-nyń júıesine uqsas ortalyqtandyrylǵan júıe qajet», - deıdi Baqyt Sultanov.
Sonymen qatar, kelissóz barysynda Qazaqstan tarapy Ózbekstandy aktsızdik saıasatty retteıtin 2009 jylǵy 20 qarashadaǵy TMD elderinde shyǵarylatyn taýarlardy aıqyndaý týraly erejege qosylýǵa shaqyrdy. Sebebi ózbek naryǵynda qazaqstandyq brendterdi jamylyp, kontrafaktilik un ónimderin tartý oqıǵalary jıi oryn alady.
