Qazaqstan-Ózbekstan memlekettik shekarasy arqyly 12 ótkizý pýnktteri qarastyrylady
ASTANA. 29 maýsym. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «2001 jylǵy 16 qarashadaǵy Qazaqstan Respýblıkasynyń Úkimeti jáne Ózbekstan Respýblıkasynyń Úkimeti arasyndaǵy Qazaqstan-Ózbekstan memlekettik shekarasy arqyly ótkizý pýnktteri týraly kelisimge Hattamany ratıfıkatsııalaý týraly» zań jobasyn maquldady.
Atalǵan hattamaǵa 2006 jylǵy 4 qyrkúıekte Astana qalasynda qol qoıylǵan.
Bul rette qujat 2001 jylǵy Qazaqstan men Ózbekstan Úkimetteri arasyndaǵy kelisimniń 1babyna sáıkes ázirlengen jáne Qazaqstan-Ózbekstan memlekettik shekarasy arqyly ótkizý pýnktteriniń tizbesin, mártebesin jáne jumys tártibin aıqyndaıtyn bolady. Sonymen qatar, osy Hattamany iske asyrý Qazaqstan men Ózbekstan arasyndaǵy halyqaralyq qatynastardy damytýǵa, eki eldiń memlekettik shekarasy arqyly adamdardy, kólik quraldaryn, júkterdi, taýarlar men janýarlardy ótkizý tártibin jetildirýge qolaıly jaǵdaı jasaıdy. Hattamanyń qosymshaǵa sáıkes Qazaqstan-Ózbekstan memlekettik shekarasynda tıisti ınfraqurylymy bar 12 ótkizý pýnkti kelisilgen. Bulardyń 2-eýi temirjol, 10-y avtokólik joldary bolyp tabylady.
Májilis maquldaǵan zań jobasy Parlament Senatyna jiberiledi.
