Qazaqstan-Ózbekstan qarym-qatynasy strategııalyq seriktestik deńgeıinde jalǵasa beredi - sarapshy pikiri
«Menińshe, Qazaqstan men Ózbekstan arasyndaǵy saıası baılanystardan aıta qoıarlyqtaı ózgerister kútýdiń qajeti joq. Óıtkeni, Ózbekstan Prezıdenti Islam Karımov el táýelsizdiginiń 25 jyldyǵyna oraı óz halqyna quttyqtaýyn 1 qyrkúıekte jarııalandy. Maǵan ol eldiń 25 jylda júrip ótken jolyn qorytyndylaý jáne bolashaqqa jasalǵan úndeý sııaqty kórindi. Dál osy quttyqtaýda Ózbekstan basqa elderdiń ishki isine aralaspaý, ózge elderdiń egemendigin qurmetteý, ózge eldiń aýmaǵynda áskerı baza ustamaý, basqa elderge ózbek eliniń qarýly kúshterin jibermeý saıasatyn ustanatyndyǵy aıtylǵan. Demek, Ózbekstannyń jalpy Ortalyq Azııaǵa qatysty ustanyp otyrǵan saıasatynda, jaqyn arada qandaı da bir ózgeris bola qoımaıdy. Qazaqstan men Ózbekstan arasyndaǵy qarym-qatynas ta strategııalyq seriktestik deńgeıinde jalǵasa beredi», - dedi sarapshy.
J.Sarabekov Ózbekstannyń kelesi prezıdenti eń aldymen ishki máselelerdi sheshýge den qoıatyndyǵyn atap ótip, I.Karımovtiń murageri kim bolýy múmkindigine qatysty óz joramalymen de bólisti.
«Qazir eki adamnyń esimi atalýda. Onyń biri - Ózbekstan Respýblıkasynyń Premer-Mınıstri Sh.Mırzıeev, al ekinshisi - vıtse-premer ári Qarjy mınıstri R.Azımov. Qazirgi ýaqytta sarapshylar arasynda da, aqparattyq keńistikte te Shavkat Mırzıeevtiń múmkinshiligi mol degen pikir qalyptasqan jáne munymen kelisýge bolady. Sebebi, Islam Karımovty jerleý rásimin uıymdastyrý jónindegi Memlekettik komıssııany kim basqarsa, sony ádette kelesi Prezıdent retinde kórýge bolady. Bul rette ishki elıta arasynda ózara kelisimniń bolatyny anyq. Al jerleý rásimin uıymdastyrýdy Shavkat Mırzıeev basqaratyndyǵy belgili. Demek, bul jaıt onyń ishki elıtamen belgili bir kelisimge qol jetkizgendigin baıqatady. Bul fakt kelesi prezıdent Sh.Mırzıeev bolady degen tujyrymdy kúsheıte túsedi», - dedi J.Sarabekov.
