Qazaqstan-Ózbekstan bıznes forýmynda 8 qujatqa qol qoıyldy
ShYMKENT. QazAqparat - Ońtústik Qazaqstan oblysynda ótken Qazaqstan-Ózbekstan bıznes forýmynda 62 mln AQSh dollarynan astam somadaǵy 8 qujatqa qol qoıyldy, dep habarlaıdy QazAqparat tilshisi.
Atap aıtqanda, oblys ákimdigi ózbekstandyq «Alliance textile» kásipornymen Ońtústiktegi toqyma ónerkásibine ınvestıtsııa salý boıynsha kelisimge kelse, «Ońtústik» arnaıy ekonomıkalyq aımaǵyndaǵy toqyma kásiporyndaryn ońaltý úshin memorandým túzildi. ıAǵnı, kórshi eldiń «Kaztehınpeks» JShS-men, sonymen birge medıtsınalyq maqsattaǵy buıymdardy óndirýge arnalǵan zaýyt qurylysyn salý boıynsha oblys ákimdigi men ózbekstandyq «Dentafıl plıýs» kompanııasy arasynda kelisimsharttar jasaldy.
Budan bólek, oblys ortalyǵynda barsha jasyl tehnologııa salasyndaǵy ınvestıtsııalyq jobalardy iske asyrý boıynsha Shymkent qalasy ákimdigi men «Halyqaralyq jasyl tehnologııalar jáne ınvestıtsııalyq jobalar ortalyǵy» kommertsııalyq emes aktsıonerlik qoǵamy arasynda seriktestik týraly kelisimge qol qoıdy. Eki eldiń 8 kásipkerleri arasynda eksportqa arnalǵan ónimderdi jetkizý týraly sharttar jasaldy.
Aıta keteıik, keshe Ońtústik Qazaqstan oblysynda iskerlik qarym-qatynasty damytý maqsatynda Qazaqstan-Ózbekstan bıznes-forýmy ótken bolatyn. Forým barysynda alǵash ret iskerlik keńestiń birinshi kezdesýi bolyp ótti. Taraptar birlesken bıznes jobalar men ınvestıtsııalyq usynystar jaıynda yntymaqtastyqty damytýdy sóz etip, eksport pen ımport boıynsha úshinshi elderge kirý jaıyn talqylady.
