Qazaqstan-Ózbekstan aımaqaralyq forýmynda 52 kelisimge qol qoıyldy
NUR-SULTAN. QazAqparat – Búgin Horezm oblysynyń Úrgenish qalasynda QR Premer-Mınıstri Asqar Mamın ÓR Premer-Mınıstri Abdýlla Arıpovpen kelissóz ótkizdi. Bul týraly QazAqparat primeminister.kz silteme jasap habarlaıdy.
Sondaı-aq, Asqar Mamın Qazaqstan men Ózbekstannyń aımaqaralyq yntymaqtastyǵynyń ІІ forýmyna qatysty.
«Bizdiń kóshbasshylarymyzdyń saıası kóregendiliginiń arqasynda Qazaqstan men Ózbekstan arasyndaǵy strategııalyq áriptestik sapalyq turǵyda jańa deńgeıge jetti», — dedi A. Mamın.
Qazaqstan Úkimetiniń basshysy ekijaqty saýda aınalymyn odan ári ulǵaıtý boıynsha qol jetkizilgen ýaǵdalastyqtar qazirgi ózara múddelerdi belsendi júzege asyrý jáne jańa baǵyttaryn izdestirý qajettigin kórsetip otyrǵanyn aıtty.
Kezdesý barysynda saýda-ekonomıkalyq, ınvestıtsııalyq, aýyl sharýashylyǵy, tranzıttik-kólik, sý-energetıkalyq, toqyma, mashına jasaý, týrıstik, ekologııalyq salalarda, sondaı-aq qarjy tehnologııalary men aımaqaralyq yntymaqtastyq salasyndaǵy ekijaqty yntymaqtastyqty ári qaraı damytý keleshegi talqylandy.
A. Mamın men A. Arıpov «Agroónerkásiptik kooperatsııa, ónerkásip jáne týrızm salasyndaǵy aımaqtyq bıznestiń yntymaqtastyǵy» taqyrybyndaǵy QR men ÓR Aımaqaralyq yntymaqtastyǵynyń II forýmynyń qorytyndy otyrysyna qatysty, sharaǵa 300-den asa adam — memlekettik organdardyń, óńirlerdiń basshylary men eki eldiń iskerlik orta ókilderi jınaldy.
QR Premer-Mınıstri Shymkent qalasyndaǵy «Ońtústik» AEA bazasynda jeńil ónerkásip boıynsha Qazaqstan-Ózbekstan klasterin qurý, Túrkistan, Tashkent, Samarqan, Buhara jáne Horezm oblystaryndaǵy týrıstik nysandar boıynsha birlesken týrıstik baǵyttar ashý, kóterme-taratý jáne agro-logıstıkalyq ortalyqtardy birlesip damytý boıynsha bastamalar kóterdi.
A. Mamın eki eldiń tranzıttik-kólik jáne logıstıkalyq salalardaǵy yntymaqtastyǵyna erekshe nazar aýdardy.
«Qazaqstan úshin sizdiń el – Ońtústik Azııaǵa shyǵý joly, Ózbekstan úshin bizdiń aýmaq – EAEO jáne Ońtústik-Shyǵys Azııa, Kavkaz ben Eýropa elderiniń naryǵyna shyǵý múmkindigi «, — dep A. Mamın, «Soltústik-Ońtústik» dáliziniń ınfraqurylymyn qalyptastyrý, sondaı-aq Transkaspıı halyqaralyq kólik baǵytyn damytý boıynsha birlesken is-qımyldy jandandyrý qajettigin atap ótti.
Forým sońynda ekonomıkalyq yntymaqtastyqty damytý týraly 52 qujatqa, onyń ishinde Forýmnyń Qorytyndy deklaratsııasyna, sondaı-aq mashına jasaý, aýyl sharýashylyǵy, qarjy-bank, ónerkásip, ınfraqurylym, farmatsevtıka jáne basqa da salalarda jalpy somasy $500 mln jýyq bolatyn vedomstvoaralyq, aımaqaralyq jáne kommertsııalyq kelisimderge qol qoıyldy.
Forým eki eldiń iskerlik orta ókilderine B2B (business-to-business) formatynda kezdesýler ótkizip, arnaıy uıymdastyrylǵan kórmede ózderiniń óndiristik jáne ınvestıtsııalyq múmkindikterin pash etýge múmkindik berdi.
