Qazaqstan-Ózbekstan aımaqaralyq yntymaqtastyq forýmy Kóshbasshy óńirler keńesine aınalmaq

ASTANA. KAZINFORM – Qazaqstan-Ózbekstan aımaqaralyq yntymaqtastyq forýmy Kóshbasshy óńirler keńesine aınalmaq. Bul týraly Aqordada Memleket basshysy Qasym-Jomart Toqaevpen kelissózderden keıingi BAQ ókilderine arnalǵan brıfıngte Ózbekstan Prezıdenti Shavkat Mırzıeev aıtty. 

“Búgin Joǵary memleketaralyq keńestiń birinshi otyrysy ótti. Bul format memleket arasyndaǵy qatynastardyń eń joǵarǵy kórinisi sanalady jáne elderimiz ben halyqtarymyzdyń jaqyndyǵyn, barlyq baǵyttaǵy yntymaqtastyqty nyǵaıtýǵa degen adaldyǵymyz ben batyldyǵymyzdy kórsetedi. Sondaı-aq, bolashaqta Parlamentterimizdiń eki palatasynyń qatysýymen Parlamentaralyq forým qurý máselesin qarastyrdyq. Biz qarym-qatynastarymyzdyń taǵy da bir jańa ınstıtýtyn – Syrtqy ister mınıstrleri keńesin qurý sheshimin qabyldadyq”, - dedi Ózbekstan Prezıdenti.

Onyń atap ótýinshe, saýda, ónerkásiptik kooperatsııalar, energetıka, kólik, aýyl jáne sý sharýashylyǵy, mádenıet salalaryndaǵy ekijaqty qarym-qatynasty odan ári damytý máselesi pysyqtaldy.

“Eń mańyzdy baǵyttardyń biri - óńiraralyq yntymaqtastyq boıynsha bastalǵan úlken jumysty odan ári jańdandyrýǵa kelistik. Ol úshin biz qoldanystaǵy aımaqaralyq yntymaqtastyq forýmy barlyq óńirimiz qatysatyn Kóshbasshy óńirler keńesine aınaldyrý bastamasyn kóterdik”, - dedi Shavkat Mırzıeev.