Qazaqstan-Ózbekstan arasynda aptasyna 40 reıs oryndalady

NUR-SULTAN. QazAqparat – Qazaqstan men Ózbekstan arasynda áýe reısi ulǵaımaq, dep habaraıdy QazAqparat Azamattyq avıtsııa komıtetine silteme jasap.

Shanhaı Yntymaqtastyq Uıymyna (ShYU) múshe memleketterdiń kólik mınıstrleriniń 9-shy keńesi sheńberinde taraptar áýe qatynasyn ulǵaıtý jáne ózara ekonomıkalyq, mádenı jáne týrıstik baılanystardy damytý úshin eki el arasynda jańa baǵyttar ashý jónindegi jumysty jalǵastyrýǵa ýaǵdalasty.

Búgingi tańda Ózbekstanmen áýe qatynasy reıster sany boıynsha da, shet memleketter arasyndaǵy baǵyttar sany boıynsha da eń qarqyndy bolyp tabylady.
Qazirgi ýaqytta Qazaqstan men Ózbekstan arasynda eki eldiń áýekompanııalary (Eır Astana, SCAT, Fly Arystan, Uzbekistan Airways) Nur-Sultan, Almaty, Aqtaý, Túrkistan, Aqtóbe jáne Tashkent, Samarqand, Namangan, Úrgench, Núkis qalalary arasynda aptasyna 40 reıs oryndaıdy.