Qazaqstan ózara kólik baılanysyn qamtamasyz etýde basty dáliz — Antonıý Koshta
ASTANA. KAZINFORM — Eýropalyq Keńes Prezıdenti Antonıý Koshta Memleket basshysyna iltıpat tanytyp, Qasym-Jomart Toqaevtyń sapar qarsańynda Euronews resýrsynda jarııalanǵan maqalasymen muqııat tanysqanyn jetkizdi. Bul týraly Aqordanyń baspasóz qyzmeti habarlady.
Onyń aıtýynsha, materıalda Eýropalyq Odaq pen Qazaqstan arasyndaǵy yntymaqtastyqty damytýdyń úsh negizgi basymdyǵy aıqyndalǵan. Atap aıtqanda, ornyqtylyqty nyǵaıtýǵa, ózara baılanysty keńeıtýge jáne azamattar úshin tyń múmkindikterge jol ashýǵa den qoıylǵan. Bul qarym-qatynastyń ortaq kún tártibindegi Brıýsseldiń ustanymdarymen úndesedi.
Eýropalyq Keńes Prezıdenti Qazaqstannyń geografııalyq ornalasýy, biregeı tarıhy men mádenıeti Eýropa men Azııanyń arasyna kópir bola alatynyna nazar aýdardy.
– Qazaqstan ózara kólik baılanysyn qamtamasyz etýde basty dáliz sanalady. Transkaspıı halyqaralyq kólik baǵdary – osy baǵyttaǵy yntymaqtastyqtyń tabysty mysaldarynyń biri. Árıne, qazirgi ýaqytta tsıfrlyq tehnologııalar sheshýshi mánge ıe bolyp otyr. Sondyqtan bilim berý, ǵylymı zertteýler men ınnovatsııalarǵa ınvestıtsııa quıý óte mańyzdy. Búgingi kóppolıarly álemde ekijaqty qarym-qatynasty da, óńirlik deńgeıdegi baılanysty da damytýymyz qajet. Biz Ortalyq Azııa elderimen yqpaldastyqty jalǵastyrýǵa shyn máninde beıilmiz, – dedi Antonıý Koshta.
Eýropalyq Komıssııa Prezıdenti Ýrsýla fon der Lıaıenniń aıtýynsha, Keńeıtilgen seriktestik jáne yntymaqtastyq týraly kelisimge qol qoıylǵannan bergi on jyl ishinde ózara saýda kólemi eki eseden asqan
– Munyń ózi kóp jaıtty ańǵartady. Sonymen qatar túrli saladaǵy áleýetimiz áli de mol. Biz saýda qatynastaryn, sonyń ishinde aýyl sharýashylyǵy salasyn ártaraptandyrýǵa múddelimiz. Budan bólek, ózara taýar aınalymy men ınvestıtsııaǵa tyń serpin berý maqsatynda saýda-sattyqtaǵy kedergilerdi eńserý máselelerin birlesip talqylaýymyz qajet. Taǵy bir másele. Vızalyq rejımdi jeńildetý jáne readmıssııalaý jónindegi kelisimder boıynsha belsendi jumys qolǵa alynǵan. Buǵan qatysty kelissózder aıaqtalyp keledi, – dedi Ýrsýla fon der Lıaıen.
Aıta ketelik Memleket basshysy EO Qazaqstannyń iri saýda jáne ınvestıtsııalyq seriktesi sanalatynyn aıtqan edi.
