Qazaqstan óz tájirıbesinde beıbitshilikte ómir súrýdiń baǵyt-baǵdaryn aıqyn kórsetti — Nııazov

ASTANA. KAZINFORM — Eýropa musylmandary forýmynyń prezıdenti Abdýl-Vahıd Nııazov Álemdik jáne dástúrli dinder kóshbasshylary Seziniń mańyzdy róli men Qazaqstan Prezıdentiniń beıbitshilik jolyndaǵy ustanymy jaıynda pikir aıtty.

— Qazaqstan Prezıdenti Qasym-Jomart Toqaev birazdan beri osy sezge erekshe mán berip otyrǵanyn bilemiz. Sondyqtan din jáne rýhanı máselelerin talqylaýǵa jastar da jumyldyrylyp otyr, sebebi barshamyzdyń bolashaǵymyzǵa tikeleı baılanysty. Atap aıtqanda, Qazaqstannyń óziniń bastamasy arqyly rýhanı máselelerge ústirtin qaramaýǵa shaqyryp otyr. Bul turǵyda qazirgi zamanǵy jaǵdaılarǵa erekshe nazar aýdarylyp otyr. Álemdik jáne dástúrli dinder kóshbasshylarynyń Sezi aıasynda barlyq el qamtylyp otyr. Sondaı-aq Qazaqstan taǵy da din qaıratkerlerine bul saladaǵy problemalardy emin-erkin talqylaýǵa óziniń alańyn usynyp, jaǵdaı jasady, — dedi A. Nııazov.

Onyń aıtýynsha, búgin sezdiń plenarlyq otyrysynda Gazadaǵy jaǵdaıǵa qatysty kóp usynys jarııalandy.

— Etnosaralyq, dinaralyq jáne ultaralyq ózara syılastyq saıasatyn júrgizip otyrǵan memleket retinde Qazaqstandy úlgi tutamyz. Osy oraıda búgingi sez aıasynda jaqsy maǵlumattar aldyq. Qazaqstan Prezıdenti plenarlyq otyrys barysynda da bastamalaryn qazaq, orys jáne aǵylshyn tilderinde jetkizdi. Bul turǵyda Qazaqstan óziniń tájirıbesinde barsha álemge beıbitshilikte, ózara túsinistik pen syılastyqta ómir súrýdiń baǵyt-baǵdaryn aıqyn kórsetti, — dedi Eýropa musylmandary forýmynyń prezıdenti.

Budan buryn habarlanǵandaı, búgin elordadaǵy Táýelsizdik saraıynda Prezıdent Qasym-Jomart Toqaevtyń qatysýymen Álemdik jáne dástúrli dinder lıderleri VIII Seziniń jumysy bastaldy. 

Memleket basshysy Taıaý Shyǵystaǵy ahýal asa kúrdeli ekenin aıtyp, álemdik dinder kóshbasshylarynyń sezine kelgen meımandardy ashyq pikir almasýǵa shaqyrdy.