Qazaqstan óz azamattary úshin onlaın qyzmetterdiń qoljetimdiligin qysqa merzim ishinde qamtamasyz etti - sarapshy pikiri

ASTANA. 28 mamyr. QazAqparat - Qazaqstan elektrondyq úkimetti damytýda úlken tabystarǵa jetýde. Bul álemdik IT-sarapshylardyń biri, «International Data Corporation» kompanııasynyń vıtse-prezıdenti Fılıpp de Marsılıaktyń pikiri, dep habarlady QR Prezıdenti janyndaǵy Ortalyq kommýnıkatsııalar qyzmetinen.

«Bárinen buryn, Qazaqstannyń óz azamattary úshin onlaın qyzmetterdiń qoljetimdiligin qysqa merzim ishinde qamtamasyz etýi maǵan qatty áser etti. Onyń ústine, kórsetiletin onlaın qyzmetterdiń sany qazirdiń ózinde aıtarlyqtaı kóp eken», - dep atap ótti AQSh, Eýropa men Azııanyń aqparattyq-kommýnıkatsııalyq tehnologııalary naryǵyn taldaý jóninde 25 jyldan astam jumys tájirıbesi bar de Marsılıak myrza. Fılıpp de Marsılıak halyqaralyq naryq, derbes kompıýter, AKT naryǵyn zertteý, onyń kásiporyndarynyń júıeleri men sheshimderi jónindegi maman.

Sarapshynyń pikirinshe, damı bastaǵanyna asa kóp bolmaǵanyna qaramastan, Qazaqstannyń elektrondyq úkimeti eýropalyq balamalarymen salystyrǵanda anaǵurlym mol nátıjeler usyna alady. «Qazirdiń ózinde jylyna 30 mıllıon suranys túsedi eken, bul óte úlken jetistik. Shamamen alǵanda, ár turǵynǵa eki suranystan keledi. Bul atalǵan júıeniń halyqqa qajettiligin kórsetedi. Óıtkeni, álemniń kez-kelgen elindegi eń basty problema - ol kezektiń kóptigi, onda adam bir qyzmet túrin paıdalaný úshin tym kóp ýaqytyn joǵaltady. Bul jaǵynan sizderde úlken alǵa jyljýshylyq bar eken. Endi kelesi qadam - azamattar elektrondyq qyzmetti budan da belsendi paıdalaný úshin, atalǵan jumysty odan ári jandandyrý qajet», - dedi Fılıpp de Marsılıak.

Búkil álemge tanymal, aqparattyq tehnologııalar naryǵyn zertteýmen aınalysatyn taldaý fırmasynyń basshysy bolyp tabylatyn de Marsılıak myrza birneshe jyldan beri elektrondyq qyzmet kórsetý salasy damýdyń joǵary deńgeıine jetken Gonkong qalasynda turady. «Bizde bıznes birneshe saǵat ishinde tirkeledi, sondyqtan da men Qazaqstandaǵy jaǵdaı da osy deńgeıde ekenin bilip óte qýanyshty boldym. Qazaqstandyq elektrondyq úkimettiń eń úlken artyqshylyǵy - munda barlyq aqparattyq júıelerdiń ózara baılanysty bolyp, tez arada aqparat almasa alatyndyǵynda. Tipti páter satqan jaǵdaıda da barlyq másele birneshe saǵattyń ishinde sheshilýi múmkin», - dep atap ótti IDC vıtse-prezıdenti.

Búginde Qazaqstanda bıznesti tirkeý bir kúnnen aspaıtyn ýaqyt ishinde júrgiziledi, ortasha eseppen alǵanda, elektrondyq úkimettiń portaly arqyly qyzmet 4-5 saǵat ishinde kórsetiledi. Onlaın qyzmet túri arqyly máseleni tez ári sapaly sheshý ókimet jumysynyń ashyqtyǵy men azamattardyń senimin aıtarlyqtaı deńgeıde arttyrady, deıdi Fılıpp de Marsılıak.