Qazaqstan azamattarynyń Grýzııadan deportatsııalanýyna qatysty jaǵdaıǵa alańdaýly

ASTANA. KAZINFORM - Qazaqstan men Grýzııanyń syrtqy ister mınıstrlikteri arasynda qos taraptyń tıisti organdar ókilderiniń qatysýymen kezekti konsýldyq konsýltatsııalar ótti, dep habarlaıdy QR Syrtqy ister mınıstrliginiń baspasóz qyzmeti.

Qazaq delegatsııasyn Qazaqstan Syrtqy ister mınıstrliginiń Konsýldyq qyzmet departamenti dırektorynyń orynbasary Baýyrjan Dosmanbetov, al grýzın delegatsııasyn Grýzııa Syrtqy ister mınıstrliginiń Konsýldyq departamentiniń dırektory Georgı Tabatadze basqardy.

Konsýltatsııalar barysynda taraptar konsýldyq saladaǵy ekijaqty ózara is-qımyl máseleleriniń keń aýqymyn talqylady. Atap aıtqanda, azamattardyń quqyqtary men zańdy múddelerin qorǵaý, ekijaqty jáne kópjaqty sharttar men konsýldyq-quqyqtyq saladaǵy halyqaralyq konventsııalardyń oryndalýy, qylmystyq-quqyqtyq yntymaqtastyq jáne azamattardy ekstradıtsııalaý máseleleri men kún tártibindegi basqa da ózekti máselelerge erekshe nazar aýdaryldy.

Kezdesý aıasynda qazaq tarapy Grýzııa aýmaǵyna kelgen kezde QR azamattaryna kirýge jıilep ketken bas tartýlar men olardyń keıinnen elden shyǵarylý jaǵdaılaryna alańdaýshylyq bildirdi. Bul rette Qazaqstan azamattarynyń basym bóligi Grýzııaǵa týrıstik maqsattarmen keletini jáne qabyldaýshy eldiń zańnamasyn berik saqtaıtyny atalyp ótti.

Óz kezeginde grýzın tarapy bıylǵy jyldyń mamyr aıynyń basynan bastap Grýzııaǵa kirýden bas tartý faktileriniń aıtarlyqtaı tómendegeni týraly habarlap, bul úrdistiń aldaǵy ýaqytta da jalǵasatynyna sendirdi, sondaı-aq Qazaqstan azamattarynyń Grýzııa aýmaǵyna kirýi men bolýyna barynsha qolaıly jaǵdaı jasaýǵa daıyn ekenin bildirdi.

Osyǵan deıin Qazaqstannyń týrısteri Grýzııaǵa jıi saparlaıtyn úzdik 10 eldiń qataryna kirgeni týraly jazdyq.