Qazaqstan oıynshyqtardyń qoqys jáshigine aınaldy - Balıeva
ASTANA. QazAqparat - Búgin Astanada ótken "Bala men kásipkerlik" taqyrybyndaǵy "dóńgelek ústeldiń" otyrysynda Parlament Májilisiniń depýtaty Zaǵıpa Balıeva ekologııalyq taza oıynshyqtar máselesin kóterdi, dep xabarlaıdy QazAqparat tilshisi.
Balalar quqyqtaryn qorǵaý jónindegi ýákildiń aıtýynsha, búginde otandyq kásipkerler ekologııalyq taza oıynshyqtardy shyǵarýdy qolǵa alýy qajet. Ol úshin memlekettik qoldaý sharalaryn da jasaǵan jón. "Máselen, Germanııada aǵash oıynshyqtar jasaıdy. Sosyn óte taza plastmasty qoldanady. Basqa oıynshyqtar múldem joq. Al olarǵa Barbıdi alyp kelse, ony júz ret tekseredi. Osydan keıin kásipkerler múldem ákelgisi kelmeı qalady. Sol sebepti nemistiń oıynshyqtary eń taza ónim bolyp sanalady. Nege Germanııa osyny qolǵa ala alady? Qazaqstan bolsa, oıynshyqtardyń kúl-qoqys alańyna aınalyp otyr. Nege solaı? Sebebi biz ondaı jaǵdaıdy ózimiz jasap qoıdyq. Endi, osy jumysty qolǵa alý qajet. Kedennen bastap, oıynshyqtardy shyǵarýshy kompanııalarǵa deıingi tizbekti tekserý kerek",-dedi Z.Balıeva. Osy oraıda ol baraxolkalarda arnaıy reıdterdi jıi ótkizip, ýly oıynshyqtardy anyqtaýdy qolǵa alýdy usyndy.
Otyrys barysynda beınebaılanys arqyly shyqqan bir kásipker nárestege arnalǵan kıim-keshekti shyǵaryp jatqanyn, biraq aýylda bala kıimderin kóp jaǵdaıda yrymdap qoldan-qolǵa berip júretinin jetkizdi. Sol sebepti taýarlar ótpeıdi. Onyń sózin bólgen Z.Balıeva: "Aýylda qalsa, qalǵan shyǵar. Biraq qalada ondaı joq", - dep óz oıyn bildirdi. Osydan keıin depýtat ol kıimniń keıbir úlgilerin tikeleı Parlamentke jiberýdi tapsyrdy. Halyq qalaýlysy taýardyń sapasyn tekserip alǵan soń, shalǵaı jerde júrgen kásipker áıelge kómektesýge nıetti.
Aıta keteıik, Balalar quqyqtaryn qorǵaý jónindegi ýákil Z.Balıeva óz qyzmetine shyndap kirisken tárizdi. Depýtat balalardy óz quqyqtaryn bilýge, paıdaly jáne zııandy tamaqty ajyratýǵa, tipti Coca-Cola-ny ishpeýge úıretpekshi.
«Sonymen, barlyǵymyz birlesip jumys isteıtin bolamyz. Endi, men elimizdegi balalardyń ekinshi anasy bolamyn. Birden aıtaıyn, meniń minezim bar. Eshkimge tynyshtyq bermeımin», - dep atap kórsetti Balıeva.
