Qazaqstan ótken jyly 68,5 mln tonna munaı eksporttady
«2020 jyly munaı jáne kondensat óndirý kólemi 85,7 mln tonnaǵa jetip, esepti jyldyń josparymen salystyrǵanda 101 paıyz boldy. Respýblıka boıynsha 2020 jyly munaı óndirý 90 mln tonnadan 85,7 mln tonnaǵa deıin tómendetildi. Koronavırýstyń taralýyna jáne kóptegen elderdegi qatań shekteý sharalaryna, álemde munaı men munaı ónimderin tutynýdyń tómendeýine, munaı men munaı ónimderiniń tez jınalyp, álemdik munaı qoımalarynyń tolyp ketý táýekelderine baılanysty 2020 jyly Úkimet munaı óndirý boıynsha shekteý sharalaryn iske asyrdy. Sonymen qatar, OPEK + elderi, munaı óndirýdi shekteý boıynsha osyndaı sharalardy qabyldady», - dedi mınıstr.
Onyń aıtýynsha, atalǵan sharalardyń arqasynda álemdik munaı naryǵynda usynys pen suranys tepe-teńdigin birtindep qalpyna kelýi baıqalady. Munaıdyń baǵa belgilenimderi bir barrel úshin 18 dollardan 50 dollarǵa deıin turaqtaldy.
Sonymen qatar ol ótken jyly elimizdiń munaı-gaz salasyndaǵy iri kompanııalar óndirgen munaı kólemine toqtaldy.
«TShO-da atalǵan kezeńde 26,4 mln tonna munaı óndirildi. Bul esepti jyldyń josparyna 100 paıyz. NKOK-ta munaı óndirý kólemi – 15,1 mln tonna, ıaǵnı 2020 jyldyń jospary 100 paıyz oryndaldy. KPO-nyń kórsetkishi 12 mln tonnany qurap otyr. 2020 jyldyń josparymen salystyrǵanda 103 paıyz óndirildi. Esepti kezeń ishinde 68,5 mln tonna munaı eksporttaldy. Bul esepti jyldyń josparymen salystyrǵanda 101,8 paıyzǵa oryndalǵan», - dedi Nurlan Noǵaev.
