Qazaqstan otbasylarynyń 45 paıyzy S sanatyna jatady – Eńbek mınıstri
ASTANA. KAZINFORM – Qazaqstandaǵy úı sharýashylyqtarynyń 45% ıaǵnı 2,8 mıllıony S sanatyna jatady. Bul – turaqty tabysy, baspanasy men kóligi bar, alaıda jekelegen memlekettik qoldaý sharalaryna áli de muqtaj otbasylar.
Eńbek jáne halyqty áleýmettik qorǵaý mınıstri Asqarbek Ertaevtyń aıtýynsha, S sanaty – ál-aýqat deńgeıi qanaǵattanarlyq otbasylar.
Munda otbasynyń ár múshesine shaqqandaǵy aılyq tabys 203 myńnan 305 myń teńgege deıin bolýy kerek. Sondaı-aq otbasynyń keminde eki múshesi jumyspen qamtylǵan, jeke turǵyn úıi men avtokóligi bolýy nemese jeke kásipkerlikpen, shaǵyn bıznespen aınalysýy múmkin.
– Mundaı otbasylar negizgi qajettilikterin qamtamasyz ete alady. Biraq jekelegen memlekettik qoldaý sharalaryna muqtaj bolady. Bul negizinen turaqty tabysy bar, ortasha dáýletti, keıde shaǵyn bıznesi bar otbasylar. Mundaı úı sharýashylyqtarynyń sany 2,8 mıllıondy nemese 45% quraıdy, – dedi A. Ertaev Ortalyq kommýnıkatsııalar qyzmetinde.
Bastysy, reforma orta tapty áleýmettik qoldaý júıesinen shyǵarmaıdy. Sondyqtan 14 tólem boıynsha shekteýler olarǵa qoldanylmaıdy.
Buǵan deıin Eńbek mınıstri «A» sanatynyń belgilerin ataǵan edi.
Járdemaqy úshin ajyrasýdyń aldyn alý úshin bólek turatyn ata-analar da balanyń otbasy quramyna engiziledi.
Eńbek mınıstri 36 járdemaqynyń 14 túrine ǵana muqtajdyq krıterııi engiziletinin aıtýda.
