Qazaqstan otandyq ǵarysh salasyn qalyptastyrýda úlken qadam jasady
«Bıylǵy jyly el tarıhynda alǵash ret úsh ǵarysh apparaty ushyrylǵany barshańyzǵa belgili. Bir baılanys apparaty men Jerdi qashyqtyqtan zondtaıtyn joǵary jáne orta apparattar. Biz úshin bul aýqymdy jeńis jáne otandyq ǵarysh salasyn qalyptastyrýdaǵy úlken qadam. Sonymen birge, el ekonomıkasyndaǵy kóptegen óndiris salalary ǵarysh qyzmetimen tikeleı baılanysty ekeni málim. Mysaly, jahandyq telefonııa, ınternet jelisine qol jetkizetin spýtnık júıeleri, tikeleı sandyq jáne teleradıohabar taratýdyń ǵaryshtyq tehnıkasyn paıdalaný onsyz múmkin emes bolar edi», - dedi jıynda baıandama jasaǵan agenttik basshysy. Sonymen qatar, agenttik tóraǵasy Elbasy joldaýyna toqtala kele, onda tolyqqandy otandyq ǵarysh salasyn qurý mańyzdylyǵy atap ótilgen. Bul rette «QazǴarysh» birqatar jobalardy iske asyra bastaǵan. Olar «KazSat» spýtnıktik aparattaryn qurý, Jerdi qashyqtyqtan zondtaý ǵarysh júıesin qurý, ǵarysh apparattaryn qurastyrý-synaý kesheni, ǵylymı-tehnologııalyq maqsattaǵy ǵarysh júıesin qurý, dáldigi joǵary spýtnıktik navıgatsııanyń Jerústi ınfraqurylymyn qurý, Baıqońyr aılaǵynda Zenıt zymyran tasyǵyshtyǵyn, ekologııalyq taza «Báıterek» zymyran tasyǵyshyn qurý jáne taǵy basqalar. Úkimet saǵaty aıasynda agenttik basshysy osy jobalardyń árqaısysyna toqtalyp ótti.
