Qazaqstan otandyq eksportty ártaraptandyrmaq
ASTANA. 15 qańtar. QazAqparat - Indýstrııa jáne jańa tehnologııalar mınıstrigi ázirlegen Ulttyq eksporttyq strategııa aıasynda Qazaqstan óz eksportyn ártaraptandyrýǵa kóshedi. Bul týraly búgin "KAZNEX INVEST" Ulttyq agenttigi eksporttyq taldaý departamentiniń dırektory Qanat Qojamqulov málim etti.
Onyń aıtýynsha, 2012 jyldyń kórsetkishteri boıynsha, Qazaqstannyń jalpy eksporttyq kólemi 86 mlrd. dollardy qurap otyr. Árıne, onyń basym bóligi shıkizattyq taýarlar, sonyń ishinde munaı men metall ónimderiniń úlesi joǵary. Al óńdelgen taýarlardyń kólemi 21,4 mlrd. AQSh dollaryn quraǵan.
«Qarqyny jaqsy. Biraq negizinen 15 taýar Qazaqstan eksportynyń 91 paıyzyn quraıdy. Onyń ishinde munaı 65 paıyzdy ıelenedi. Negizgi maqsatymyz - ártaraptandyrý saıasatyn qarqyndatý. Onyń ishinde taýarlyq ártaraptandyrý jáne eldik ártaraptandyrý. Osy baǵytta ulttyq eksporttyq strategııa jasaldy. Onyń basty baǵyty - shıkizattyq eksporttan elimizdi táýelsiz etý», - dep atap ótti ol.
Strategııa sheńberinde metallýrgııa, kólik qurastyrý, hımııa jáne tamaq ónerkásibiniń taýarlaryna eksporttyq basymdyq berilmek. Sonymen qatar qazaqstandyq eksporttyń ótkiziletin negizgi 12 naryǵy anyqtaldy. Olar: Reseı, Ózbekstan, Qyrǵyzstan, Tájikstan, Túrkimenstan, Armenııa, Ázirbaıjan, Grýzııa, Qytaı jáne onyń batysyndaǵy aımaqtar, Aýǵanstan, Iran jáne EO naryǵy.
