«Qazaqstan» ortalyq kontsert zalynda «Jan jylýy» baǵdarlamasynyń 5 jyldyq mereıtoıyna arnalǵan kontsert ótti

ASTANA. QazAqparat - Búgin Astanadaǵy «Qazaqstan» ortalyq kontsert zalynda «Qazaqstan» ulttyq arnasynyń uıymdastyrýymen «Jan jylýy» baǵdarlamasynyń 5 jyldyq mereıtoıyna arnalǵan qaıyrymdylyq kontserti boldy.

«Ulystyń Uly kúni Naýryz - adamdardy tatýlastyratyn, qaıyrymdylyq jasaıtyn, kómekke muqtaj jandarǵa qol ushyn beretin ulyq mereke. Osy meıram qarsańynda «Jan jylýy» baǵdarlamasynyń 5 jyldyq jumysyn qorytyndylap, qaıyrymdylyq kontsertin ótkizýdi jón kórdik», - deıdi uıymdastyrýshylar.

Kontsert barysynda «Jan jylýy» baǵdarlamasy arqyly jandaryna medeý taýyp, qaıyrymdy jandardyń qamqorlyǵyna ıe bolǵan jarymjan jandar týraly beınekórinister kórsetilip, artynsha sol adamdar sahnaǵa shyǵyp, qaıyrymdy jandarǵa júrekjardy alǵystaryn aıtty.

Aıta keteıik, «Jan jylýy» baǵdarlamasynyń kómegimen jetimder úıinen 20 bala jańa otbasyn tapqan, 13 bala shetelde em alyp, baspanasy joq 8 otbasy jańa úıdiń kiltine ıe bolǵan.

Sharaǵa belgili qoǵam qaıratkerleri, depýtattar men múmkindigi shekteýli jandarǵa kómek bergen demeýshiler, óner juldyzdary men bireýdiń qaıǵysyn óz qaıǵysyndaı qabyrǵasy qaıysa bólisetin meıirimdi jandar qatysty.