Qazaqstan Ortalyq Azııany kólik-logıstıkalyq torapqa aınaldyrý usynysyn qoldaıdy - mınıstr

ASTANA. QazAqparat – Qazaqstan Ortalyq Azııany kólik-logıstıkalyq torabyna aınaldyrýǵa umtylady. Elordada ótip jatqan Azııadaǵy qaýipsizdik jáne yntymaqtastyq forýmynda sóz sóılegen Syrtqy ister mınıstri Murat Nurtileý osylaı málim etti, dep habarlaıdy QazAqparat tilshisi.

«Bizdiń álemniń eshqashan tynysh bolmaǵany belgili. Qazir betpe-bet kelip otyrǵan máseler belgili bir deńgeıde qaýip tóndirýi múmkin. Osylardy eskere otyryp, Qazaqstan kópvektorly, syndarly saıasatty jalǵastyryp keledi. Sondaı-aq, biz Birikken ulttar uıymynyń jarǵysynda jáne halyqaralyq quqyqta bekitilgen qundylyqtar men qaǵıdalardy berik ustanamyz. Buǵan qosa, Azııanyń ekonomıkalyq jáne sası turǵydan sheshýshi ról atqaratyny belgili. Qazaqstan óz tarapynan Azııanyń uzaq merzimdi jáne turaqty damýyn qamtamasyz etýge baǵyttalǵan bastamalardy kóterip otyrady», - dedi Murat Nurtileý.

Mınıstr atap ótkendeı, Qazaqstan Ortalyq Azııa elderi arqyly ótetin taýar kólemin arttyrý maqsatynda qoldanysta bar dálizderdi damytýǵa jáne jańa baǵyttar ashýǵa asa kóńil bólýde.

«Qazaqstan Ortalyq Azııany kólik-logıstıkalyq torabyna aınaldyrýǵa umtylady. Biz soltústik-ońtústik jáne shyǵys-batys baǵytyndaǵy transqurlyqtyq kólik dálizin, sonyń ishinde Transkaspıı kólik marshrýtyn damytýdy qoldaımyz jáne jalǵastyramyz», - dep túıindedi mınıstr.

Eske salaıyq, buǵan deıin elordada Azııadaǵy qaýipsizdik jáne yntymaqtastyq forýmy ótip jatqanyn habarlap edik. Oǵan Azııa elderinen kelgen 60-tan astam sarapshy qatysyp jatyr.