Qazaqstan Ortalyq Azııadaǵy áýe naryǵynan aıyrylyp qalmaýdyń qamyn oılaýy kerek
ASTANA. QazAqparat - Qazaqstan Ortalyq Azııadaǵy áýe naryǵynan aıyrylyp qalmaýdyń qamyn oılaýy kerek. Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Nıkolaı Logýtov osyndaı másele kóterdi.
«Almaty» halyqaralyq áýejaıynyń ushý talaptaryna sáıkes emes ekenin biz birneshe márte kótergenbiz. Al osy máseleni ary qaraı zerdelesek, halyqaralyq talaptarǵa saı keletin jańa áýejaı salý ózekti bolyp tabylady. Óıtkeni, búgingi tańda óńirdegi tranzıttik jolaýshylar aǵyny kúrt artyp otyr», - deıdi N. Logýtov.
Onyń aıtýynsha, Ortalyq Azııanyń júreginde ornalasqan Qazaqstan áýe naryǵynyń bel ortasynda tur.
«Toqtala ketetin jaıt, búgingi tańda óńirde aǵylǵan áýe tasymaldardyń úlken bóligi Qyrǵyzstan men Ózbekstan arqyly da ótip jatyr. Sondyqtan da, muny eskergen bizdiń kórshilesterimiz áýejaı salý máselesine úlken mán berip, túbegeıli aınalysýǵa kirisken. Biz de búgin osy máseleni qolǵa almasaq áýe naryǵynan aıyrylyp qalýymyz yqtımal», - dedi depýtat N. Logýtov.
