Qazaqstan Ortalyq Azııa elderine shekarany shegendeý tájirıbesin bólisýge daıyn – Prezıdent
«Biz, memleketter basshylary óńirdegi áli de saqtalyp otyrǵan turaqsyzdyq faktorlaryn barynsha joıý úshin barlyq múmkindikti jasaýǵa tıispiz. Memleketaralyq shekaralardaǵy árbir myltyq daýsynyń jańǵyryǵy eki elge ǵana emes, búkil óńirge jaǵymsyz áser etedi.
Kerisinshe, dál qazirgi daǵdarys jaǵdaıynda memleketterimiz qaıshylyqtardy eńserý isinde órkenıettiliktiń, jaýaptylyqtyń úlgisin kórsetýge tıis. Shekarany zańdy túrde rásimdeý úderisiniń óte kúrdeli ári qıyn ekenin óz tájirıbemizden bilemiz. Daýly máseleler shynaıy tatý kórshilik pen halyqaralyq quqyqtyń irgeli qaǵıdattaryna qurmet kórsetý arqyly tek qana beıbit jolmen sheshilýi múmkin. Bunyń basqa joly joq», - dedi Qasym-Jomart Toqaev Ortalyq Azııa memleketteri basshylarynyń IV Konsýltatıvtik kezdesýinde.
Memleket basshysynyń paıymynsha, problemalardy sozbaqqa salý men jyly jaýyp qoıý shıeleniske bastaýy múmkin.
«Tipti Ortalyq Azııadaǵy yntymaqtastyqty damytýǵa baǵyttalǵan barlyq kúsh-jigerimizdi joqqa shyǵarýy múmkin. Postkeńestik keńistikte óziniń shekarasyn tolyq delımıtatsııa jasaǵan memleket retinde, Qazaqstan, ózara tıimdi sheshimder izdestirýge barynsha kómek kórsetýge daıyn. Naqtyraq aıtqanda, shekarany delımıtatsııalaýdyń ózara tıimdi tásilderin ázirleý úshin sarapshylar alańyn qurýdy usynamyz.
Bul jumysqa tájirıbeli zańgerler, kartograftar, shekarashylar jáne basqa da mamandardy tartý kerek.
Osy iste úılestirý mindetin Syrtqy ister mınıstrler keńesine júkteýge bolady», - dedi Prezıdent.
Aıta keteıik, Qyrǵyz Respýblıkasynyń Sholpan-Ata qalasynda Ortalyq Azııa memleketteri basshylarynyń IV Konsýltatıvtik kezdesýi ótip jatyr.
Jıynǵa Qazaqstan, Qyrǵyzstan, Tájikstan, Túrikmenstan, Ózbekstan kóshbasshylary qatysýda.
Buǵan deıin Qazaqstan Prezıdenti Qasym-Jomart Toqaevtyń Qyrǵyzstannyń Sholpan-Ata qalasyna barǵanyn jazǵan bolatynbyz.
Foto: akorda.kz
