Qazaqstan Ortalyq Azııa elderin Aýǵanstandy birge damytýǵa shaqyrdy

ASTANA. QazAqparat - Qazaqstan kórshiles ornalasqan Ortalyq Azııa elderin birlesip kúsh salý arqyly Aýǵanstannyń damýyna járdem berýge shaqyrdy, dep habarlaıdy QazAqparat tilshisi.

«Bizdiń pikirimizshe, Ortalyq Azııa elderi men Aýǵanstandy ekonomıkalyq baılanystarda biriktirýge bolady. Ujym bolyp Aýǵanstannyń áleýmettik-ekonomıkalyq damýyna basymdyq berip, naqty ekonomıkalyq jobalary bar halyqaralyq bıznesti tartý arqyly keshendi damý baǵdarlamasyn qabyldaýymyz qajet»,- dedi QR Syrtqy ister mınıstri Qaırat Ábdirahmanov Astanada ótip jatqan «Aýǵanstandaǵy áıelderdiń quqyqtary men múmkindikterin keńeıtý» óńirlik konferentsııasynda.

Mınıstr Qazaqstannyń BUU Qaýipsizdik Keńesiniń Turaqty emes múshesi retinde Aýǵanstan múddesin qorǵaýǵa basymdyq beretinin jetkizdi. Sebebi, eldiń qalpyna kelýi men memleket ishinde beıbitshilik pen turaqtylyqtyń ornaýy tutas Ortalyq Azııanyń qaýipsizdigi úshin asa mańyzdy.

Óz tarapynan Qazaqstan qańtar aıynda BUU Qaýipsizdik Keńesi músheleriniń Aýǵanstanǵa saparyn uıymdastyrǵan bolatyn. Odan bólek, kommertsııalyq júk logıstıkasy, energetıka, avtomobıl joldary men temir joldardy salý, paıdaly qazbalardy óndirý jóninde yntymaqtastyq ornatyp jatyr. Prezıdenttiń bastamasy boıynsha, Qazaqstan Aýǵanstannyń myńdaǵan stýdentterin tegin oqytý mindetin aldy jáne bul maqsatqa 50 mıllıon dollar bólindi.