Qazaqstan «Ortalyq Azııanyń jasyl qalqany» bastamasyn usyndy
ASTANA. KAZINFORM – Shańdy jáne qumdy daýyldar bir orynda turmaı, búkil óńirge taraıdy. Sondyqtan bul máselemen kúreste aımaqtaǵy barlyq el birigýi tıis. Bul jóninde QR Ekologııa jáne tabıǵı resýrstar mınıstri Erlan Nysanbaev Óńirlik ekologııalyq sammıtte málimdedi.
– Biz tıisti rezolıýtsııaǵa qol qoıýdy, óńirlik baǵdarlamany iske qosýdy, naqty jumys aımaqtary men ózara birlesip áreket etý mehanızmderin bekitýdi usynamyz. Ortalyq Azııa elderindegi áriptesterimizben aıtarlyqtaı daıyndyq jumysy atqaryldy. Rezolıýtsııa jobasy ázirlenip, orman ósiriletin ýchaskeler anyqtaldy, – dedi ol.
Baǵdarlamaǵa Qazaqstan, Ózbekstan, Túrikmenstan, Tájikstan jáne Qyrǵyzstan atsalysady. Halyqaralyq seriktester retinde ekologııa baǵytynda jumys isteıtin halyqaralyq uıymdar men qorlar qarastyrylyp jatyr.
Erlan Nysanbaevtyń sózinshe, bul bastama azyq-túlik qaýipsizdigin, tabıǵı resýrstardy tıimdi basqarýdy qamtamasyz etedi. Sondaı-aq, aımaqtyq seriktestikti damytyp, klımattyq ózgeriske beıimdelýge jol ashady.
Demek, elimiz saıası deklaratsııany ǵana emes, is júzinde júzege asyrýǵa bolatyn tıimdi jobany usynyp otyr. Ortalyq Azııadaǵy bes memlekettiń árqaısysy óz aýmaǵyndaǵy qaı ólkelerge orman ósiretinin ózderi sheshedi. Biraq sonyń bári aımaq úshin ortaq jasyl qalqanǵa aınalady. Sóıtip, ekologııalyq ahýal oń dınamıkaǵa ulasady.
– Qazaqstan qazirdiń ózinde aǵash egý boıynsha aımaqtaǵy eń iri jobalardyń birin iske asyryp jatyr. Kelesi qadam – júıeli qorǵanys ınfraqurylymyn qurý. «Ortalyq Azııanyń jasyl qalqany» – jańa óńirlik ekologııalyq model. Ol kúlli aımaqtyń turaqtylyǵyna áser etedi, – dedi mınıstr.
Aıta keteıik, buǵan deıin shańdy jáne qumdy daýyldar jıilep bara jatqanyn jazǵanbyz.
