Qazaqstan Ortalyq Azııadaǵy iri gaz habyna aınalyp keledi
ASTANA. KAZINFORM - Qazaqstan Eýrazııadaǵy mańyzdy energetıkalyq jáne logıstıkalyq ortalyq retindegi pozıtsııasyn senimdi túrde nyǵaıtyp keledi, dep habarlaıdy QR Energetıka mınıstrliginiń baspasóz qyzmeti.
Bul úderiste Reseı Federatsııasymen gaz salasyndaǵy yntymaqtastyq eki memleket arasyndaǵy strategııalyq makroekonomıkalyq áriptestiktiń negizgi baǵyttarynyń biri bolyp qala beredi.
Búginde kórshi elderdiń ózara is-qımyly resmı deklaratsııalar sheńberinen áldeqaıda asyp tústi. Birlesken jumys ınfraqurylymnyń úzdiksiz jumysyn qamtamasyz etýdi, kómirsýtekterdi óńdeý kólemin arttyrýdy jáne eksporttyq-tranzıttik qýattardy júıeli túrde keńeıtýdi qamtıdy.
Qazaqstan bul múmkindikterdi óńirlik jetkizilim qaýipsizdigin qamtamasyz etý maqsatynda dáıekti túrde qoldap keledi. Yntymaqtastyqtyń negizgi basymdyǵy gaz tasymaldaý jelisin jańǵyrtýǵa baǵyttalǵan. Geografııalyq ornalasýy men tehnıkalyq daıyndyǵy Qazaqstanǵa reseılik tabıǵı gazdy Ózbekstan men Qyrǵyzstan naryqtaryna tranzıtteýde mańyzdy ról atqarýǵa múmkindik beredi. Sonymen qatar, bul kólik dálizi Reseı Federatsııasyna keri baǵyttaǵy gaz tranzıtin de tabysty qamtamasyz etýde. Osyndaı kópvektorly baǵyt otandyq qubyrlardy qurlyqtaǵy asa mańyzdy energetıkalyq arterııalardyń birine aınaldyryp otyr.
Áriptestiktiń taǵy bir strategııalyq ári tarıhı turǵydan tıimdi baǵyty — Qazaqstannyń Qarashyǵanaq ken ornynan alynatyn shıki gazdy Reseıdegi Orynbor gaz óńdeý zaýytynda óńdeý. Kópjyldyq yntymaqtastyq óndiristik jáne ekonomıkalyq kooperatsııanyń turaqty úlgisine aınaldy.
-Tehnologııalyq qýattardy ózara paıdalaný eki el ekonomıkasyna da tikeleı tıimdilik ákelip, gaz salasynyń sapaly damýyna yqpal etip otyr. Senimdi logıstıkalyq baǵyttardy damytý jáne ınfraqurylymdy kezeń-kezeńimen jańǵyrtý — Qazaqstannyń sózsiz basymdyǵy. Mundaı pragmatıkalyq tásil ekonomıkaǵa qosymsha tabys tartýǵa, Ortalyq Azııa memleketteriniń ekonomıkalyq baılanysyn kúsheıtýge jáne is júzinde respýblıka bazasynda senimdi qurlyqtyq gaz habyn qalyptastyrýǵa múmkindik beredi,-delingen habarlamada.
Osyǵan deıin Qazaqstan men Reseı arasyndaǵy taýar aınalymy 16% artqany týraly jazdyq.
