Qazaqstan Ortalyq Azııadaǵy eń iri polımer óndirýshi elge aınalady — Oljas Bektenov
ASTANA. KAZINFORM — Qazaqstannyń bolashaǵy tehnologııalyq órleýmen baılanysty. Bul týraly Kazakhstan Energy Week — 2025 jáne XVI Eýrazııalyq KAZENERGY forýmynda Úkimet basshysy Oljas Bektenov málim etti.
— Prezıdent Qasym-Jomart Toqaev atap ótkendeı, Qazaqstan energetıkalyq qaýipsizdikti nyǵaıtyp, energııamen ózin-ózi tolyq qamtamasyz ete alatyn jaǵdaıǵa jetýdi maqsat etip otyr. Osy baǵytta halyqaralyq áriptestermen birge kóptegen iri jobalar iske asyrylýda. Bul oraıda eń iri korporatsııalar men sarapshylar qaýymynyń basyn qosqan KAZENERGY forýmy 16 jyldan beri mańyzdy ári tıimdi alańǵa aınaldy. Qaýymdastyqtyń mereıli jylynda forým alǵash ret Shanhaı yntymaqtastyq uıymy men Arab memleketteri lıgasy elderin biriktirip otyr. Búginde jahandyq energetıkadaǵy túbegeıli ózgerister jaǵdaıynda jáne eń iri derjavalar arasynda ózara kelisim men turaqtylyqty ilgeriletýde «orta» derjavalardyń róli artyp keledi. Qazaqstan ashyqtyq pen tehnologııalyq jańǵyrý qaǵıdattaryn berik ustanady. Memleket basshysy júrgizilip jatqan jumystyń barlyǵy elimizdiń tikeleı shetel ınvestıtsııasyna tartymdylyǵyn arttyrýǵa baǵyttalyp otyrǵanyn basa aıtty, — dedi Oljas Bektenov.
Osy oraıda ol QR Úkimeti bıznesti turaqty energetıkalyq bolashaqty birlesip damytýǵa shaqyratynyn atap ótti. Jobalardy tabysty júzege asyrý úshin Qazaqstanda qajetti jaǵdaıdyń barlyǵy jasalǵan.
— Bizde baı tabıǵı resýrstar men strategııalyq mıneraldar, Eýropa men Azııany jalǵaıtyn kólik-logıstıkalyq dálizder, bilikti jumys kúshi bar. Qazaqstannyń munaı-gaz sektory búginde eksporttyq-shıkizat úlgisinen keshendi óńdeý júıesine bet burǵan joǵary tehnologııalyq klasterge aınaldy. Qazaqstannyń bolashaǵy tehnologııalyq órleýmen baılanysty. Bul rette qazirdiń ózinde naqty nátıjelerdi atap kórsetýge bolady. Munaı-gaz hımııasynda jalpy qýaty 500 myń tonna bolatyn polıpropılen zaýyty iske qosyldy. Sondaı-aq jylyna 1,25 mln tonna polıetılen óndiretin joba júzege asyrylyp jatyr. Ol Qazaqstandy Ortalyq Azııadaǵy eń iri polımer óndirýshi elge aınaldyrady. Budan bólek býtadıen, karbamıd óndirý jobalary qolǵa alyndy. 2030-shy jylǵa deıin jalpy quny 15 mlrd AQSh dollarynan asatyn alty jobany iske asyrý josparlanyp otyr. Bul munaı-gaz hımııasy óndirisiniń kólemin ulǵaıtyp, ondaǵan myń jańa jumys ornyn ashýǵa múmkindik beredi, — dedi Úkimet basshysy.
Budan buryn habarlanǵandaı, Kazakhstan Energy Week — 2025 jáne XVI Eýrazııalyq KAZENERGY forýmynda «QazMunaıGaz» UK» AQ basqarma tóraǵasy Ashat Hasenov kompanııa úshin asa mańyzdy baǵyttardy atady.