Qazaqstan Ortalyq Azııadaǵy eń iri ekonomıka retindegi kóshbasshylyǵyn saqtap keledi
ASTANA. KAZINFORM — 2025 jyldyń qorytyndysy boıynsha eldiń JІÓ 159,6 trln teńgege nemese shamamen 306 mlrd AQSh dollaryna jetti. Qazaqstanǵa óńirdiń jıyntyq JІÓ-niń shamamen 54%-y tıesili.
Bul týraly «Ekonomıkalyq zertteýler ınstıtýty» AQ Basqarma tóraǵasynyń orynbasary Dastan Ákebaev Astanada ótken National Think Tank Forum «Bolashaq proektsııasy: nátıjelerdi paıymdaýdan jańa kún tártibine deıin» forýmynda málimdedi.
Onyń aıtýynsha, sońǵy bes jylda Qazaqstan ekonomıkasynyń naqty ósimi 21,3%-dy qurady. Bul rette ekonomıka aýqymynyń ulǵaıýy birtindep júrip jatqan qurylymdyq ózgeristermen qatar júrýde — óńdeý ónerkásibiniń, kásipkerliktiń, ınvestıtsııalar men ishki naryqtyń róli artyp keledi.
2025 jyly óńdeý ónerkásibindegi óndiris kólemi 30,7 trln teńgege jetti. 2021 jylmen salystyrǵanda atalǵan sektordaǵy ónerkásiptik óndiris ındeksi 23,4%-ǵa ósti.
Jan basyna shaqqandaǵy JІÓ kórsetkishinde de oń dınamıka baıqalady. 2025 jyly bul kórsetkish 7,8 mln teńgeni nemese 15 myń AQSh dollarynan astam somany qurady. 2021 jylmen salystyrǵanda kórsetkish teńgemen eseptegende 77,2%-ǵa, al dollarlyq mánde 44,7%-ǵa ósti.
— Ekonomıka aýqymynyń ulǵaıýy birtindep júrip jatqan qurylymdyq ózgeristermen qatar júrýde — óńdeý ónerkásibiniń, kásipkerliktiń, ınvestıtsııalar men ishki naryqtyń róli artyp keledi, — dep atap ótti ol.
Investıtsııalyq belsendilik ekonomıkalyq ósýdiń negizgi faktorlarynyń biri bolyp qala beredi. 2025 jyly negizgi kapıtalǵa salynǵan ınvestıtsııalar 23,5 trıllıon teńgege jetti, bul 2021 jylmen salystyrǵanda 53%-ǵa óskenin kórsetedi.
Sonymen qatar, shaǵyn jáne orta bıznestiń orny nyǵaıyp keledi, bul sektorda 4,53 mıllıon adam jumyspen qamtylǵan — bes jyl ishinde jumyspen qamtylǵandar sany 28,9%-ǵa ósti. Eldiń JІÓ-degi shaǵyn jáne orta bıznestiń úlesi 40,9%-ǵa jetti, bul 2021 jylmen salystyrǵanda 7,4% óskenin kórsetedi.
Jumys istep turǵan shaǵyn jáne orta kásipkerlik sýbektileriniń sany 2,18 mln-ǵa jetti.
Osylaısha, sońǵy jyldardaǵy ekonomıkalyq dınamıkasy tek JІÓ-niń ósýimen ǵana emes, sonymen qatar onyń qurylymynyń birtindep ózgerýimen, ınvestıtsııalyq belsendiliktiń artýymen jáne jeke kásipkerliktiń róliniń keńeıýimen sıpattalady.
Osyǵan deıin Qazaqstan men Ázerbaıjan ekonomıkanyń jańa modelin qalaı qalyptastyryp jatqanyn jazǵan edik.
