Qazaqstan Ortalyq Azııadaǵy eń qarqyndy damyp kele jatqan ekonomıkaǵa ıe – Jozep Borrel
ASTANA. KAZINFORM - Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy ókili Jozep Borrel Kazinform tilshisine Qazaqstan Respýblıkasy Kólik mınıstrligi men Eýropalyq ınvestıtsııalyq bank arasynda 500 mln eýro somasyna ózara túsinistik týraly memorandýmǵa qol qoıý týraly pikirimen bólisti.
Onyń aıtýynsha, bul Qazaqstan men Eýroodaqtyń ekonomıkalyq jaqyndasýyna yqpal etedi. Eýropalyq dıplomatııa basshysy Ortalyq Azııa men Eýroodaq arasynda ózara kólik baılanysy boıynsha Investorlar forýmynyń ashylýyna qatysty.
«Búgin Brıýsselde Ortalyq Azııa men Eýroodaq arasynda ózara kólik baılanysy boıynsha ınvestorlarynyń «Global Gateway» atty birinshi forýmy aıasynda Qazaqstan Respýblıkasynyń Kólik mınıstrligi men Eýropalyq ınvestıtsııalar bank arasynda 500 mln eýro somasyna ózara túsinistik týraly memorandýmǵa qol qoıylǵanyna qýanyshtymyn», - dedi Jozep Borrel.
«Bul Qazaqstan men Eýroodaqtyń ekonomıkalyq jaqyndasýyna yqpal etedi», - dep atap ótti ol.
Ol Eýropa astanasynda qol qoıylǵan memorandým Transkaspıı halyqaralyq kólik baǵytyn odan ári damytýǵa baǵyttalǵanyn, bul EO elderi men Ortalyq Azııa arasyndaǵy tranzıttik áleýetti arttyrýǵa múmkindik beretinin basa aıtty.
Qujat Qazaqstan Respýblıkasynda Eýropa men Ortalyq Azııa arasyndaǵy turaqty kólik baılanysy maqsattaryna qol jetkizýge yqpal etetin jobalardy qarjylandyrý múmkindigin qarastyrady.
Sonymen qatar, Brıýsselde Qazaqstannyń Damý banki men Eýropalyq ınvestıtsııalyq bank arasynda 320 mln eýro somasyna ózara túsinistik týraly memorandýmǵa qol qoıyldy.
Eske sala ketsek, Brıýsselde Eýropa men Ortalyq Azııa arasyndaǵy turaqty kólik dálizderin damytý jónindegi «Global Gateway» ınvestıtsııalyq forýmy aıasynda Qazaqstan men eýropalyq áriptester arasynda quny 800 mln eýrodan asatyn tórt qujatqa qol qoıyldy.
