Qazaqstan Ortalyq Azııadaǵy eń baı elge aınaldy - Global Finance
ASTANA. KAZINFORM – Álemdegi eń kedeı elder reıtıngisinde Qazaqstan Ortalyq Azııadaǵy kórshileri arasynda eń tómengi – 128-shi orynda. 34 534 AQSh dollaryn quraıtyn jalpy ishki ónim men satyp alý qabiletiniń parıteti boıynsha bizdiń elimiz eń joǵary ekonomıkalyq mártebege ıe jáne Ortalyq Azııa respýblıkalary arasynda eń baı el dep tanyldy, dep habarlady Global Finance.
Aıta ketý kerek, Ortalyq Azııa respýblıkalarynan Qazaqstanǵa eń jaqyn ornalasqan Túrikmenstan 101-shi orynda tur. Ózbekstan men Qyrǵyzstan sáıkesinshe 67-shi jáne 48-shi orynda. Reıtıngtegi Ortalyq Azııa elderiniń ishindegi eń kedeıi-43-shi orynda turǵan Tájikstan.
Qazaqstan bul reıtıngte álemde kedeılik deńgeıi boıynsha 98 jáne 113-oryndarda turǵan Ázerbaıjan men Qytaıdan alda tur. Biraq baýyrlas Túrkııa Qazaqstandy basyp ozyp, reıtıngte 140-orynǵa jaıǵasty.
Reıtıngke sáıkes álemdegi eń kedeı elderdiń biri Ońtústik Sýdan 2011 jyly qurylǵannan beri zorlyq-zombylyqqa ushyrady. Áleýmettik kelispeýshilikter, teńsizdikter, sybaılas jemqorlyq pen soǵystar jaǵdaıdy jaqsartpaıdy. Bıylǵy jyly 9 mıllıonǵa jýyq adam, Ońtústik Sýdan halqynyń 60% - dan astamy gýmanıtarlyq kómekke muqtaj boldy.
Teńizge shyǵa almaıtyn kishkentaı Býrýndı eń kedeı elder reıtıngisinde ekinshi orynda. Elde tabıǵı resýrstar qory joq jáne el 1993 jyldan 2005 jylǵa deıin sozylǵan azamattyq soǵystan zardap shekti.
Úshinshi orynda Ortalyq Afrıka Respýblıkasy ornalasqan. Bul el altynǵa, munaıǵa, ýranǵa jáne gaýharǵa baı bolǵanymen qandaı da bir sebeptermen eń kedeı elder qatarynda.
Álemdegi eń kedeı elderdiń ondyǵyna Kongo Demokratııalyq Respýblıkasy, Mozambık, Nıger, Malavı, Lıberııa, Madagaskar jáne Iemen de kirdi.