Qazaqstan Ortalyq Azııadaǵy AI-ınfraqurylym ortalyǵyna aınalýǵa nıetti – Baǵdat Mýsın
ASTANA. KAZINFORM – Qazaqstan energetıkalyq áleýetin, telekommýnıkatsııalyq ınfraqurylymyn jáne halyqaralyq tsıfrlyq baılanystaryn paıdalana otyryp, jasandy ıntellekt salasyndaǵy esepteý qýatyn damytýdy kózdeıdi.
Bul týraly «Qazaqtelekom» AQ basqarma tóraǵasy Baǵdat Mýsın AI and Digital Bridge forýmynda aıtty.
Onyń aıtýynsha, Qazaqstan bul baǵyttaǵy jumysty qolda bar resýrstar men tehnologııalyq múmkindikterdi tıimdi paıdalanýdan bastaýy kerek.
– Biz, eń aldymen, qolda bar múmkindikterden bastaýymyz kerek. Bizde resýrstar bar, kómirimiz bar, ony energııaǵa aınaldyryp, esepteý qýatyn qalyptastyra alamyz, – dedi ol.
Spıkerdiń sózinshe, álemde jasandy ıntellektini damytýǵa qajetti esepteý qýatyna suranys artyp keledi. Osyǵan baılanysty Qazaqstan energetıkalyq resýrstaryn tsıfrlyq ınfraqurylymmen ushtastyryp, jańa tehnologııalyq baǵyttardy damytýǵa múmkindik ala alady.
– Qazir búkil álemde esepteý qýatyna suranys joǵary. Eger biz óz múmkindikterimizdi, derekter ortalyqtaryn damytý jumystaryn jáne Nvidia sııaqty tehnologııalyq kompanııalarmen yntymaqtastyqty biriktirsek, osy saladaǵy óz quzyretterimizdi qalyptastyra alamyz, – dep atap ótti Baǵdat Mýsın.
Onyń aıtýynsha, jasandy ıntellekt ınfraqurylymyn damytý ǵarysh ındýstrııasymen de baılanysty. Bul baǵytta esepteý qýatyn arttyrýmen qatar, ǵaryshtyq jáne jerústi ınfraqurylymdarynyń ózara baılanysyn qamtamasyz etý mańyzdy.
Sonymen qatar Baǵdat Mýsın Qazaqstanǵa iri tehnologııalyq kompanııalardy tartý máselesine de toqtaldy.
Onyń pikirinshe, elimizdiń Ortalyq Azııadaǵy geografııalyq ornalasýy óńir memleketterine tsıfrlyq qyzmetter usynýǵa múmkindik beredi.
– Nelikten iri tehnologııalyq kompanııalar Qazaqstanǵa kelýi kerek? Birinshiden, bul tehnologııalarmen jumys isteıtin naryqqa alǵashqylardyń biri bolyp kirgender kóbirek paıda kóre alady. Biz Ortalyq Azııa elderine osyndaı qyzmetter usyna alamyz. Bul rette Qazaqstan óńirlik ortalyq bola alady, – dedi ol.
Sonymen qatar spıker jasandy ıntellekt salasynda esepteý qýatynyń bolýy jetkiliksiz ekenin atap ótti. Onyń aıtýynsha, halyqaralyq tsıfrlyq baılanystardyń sapasy da mańyzdy ról atqarady.
– Jasandy ıntellekt revolıýtsııasy úshin esepteý qýaty ǵana emes, elder arasyndaǵy ózara baılanys ta qajet. Biz jahandyq tsıfrlyq keńistikpen tyǵyz baılanysta bolýymyz kerek, – dedi Baǵdat Mýsın.
Osy rette ol Qazaqstannyń talshyqty-optıkalyq baılanys ınfraqurylymyn damytý jáne Kaspıı óńirindegi derekterdi tasymaldaý baǵyttarynyń múmkindikterin keńeıtý jumystaryna nazar aýdardy. Spıkerdiń sózinshe, bul baǵyttaǵy maqsattardyń biri – derekterdi jetkizý kidirisin 45 mıllısekýndqa deıin qysqartý.
Baǵdat Mýsın iri tehnologııalyq kompanııalardy tartýda memlekettik qoldaý men qolaıly quqyqtyq jaǵdaıdyń da mańyzyn atap ótti.
– Úkimet bul ındýstrııany qoldaıdy. Bizge osyndaı kompanııalardy tartý úshin qajetti jaǵdaı jasaý mańyzdy, – dedi ol.
Onyń aıtýynsha, derekter ortalyqtaryn damytý úshin energetıkalyq ınfraqurylymnyń jetkilikti bolýy sheshýshi faktorlardyń biri sanalady.
– Energııa óndirý josparlaryna toqtalsaq, qosymsha 5 GVt energetıkalyq qýat qalyptastyrý múmkindigi bar ekenin atap ótkim keledi. Ony osyndaı esepteý qýattaryn damytýǵa paıdalanýǵa bolady, – dep túıindedi Baǵdat Mýsın.
Buǵan deıin Qazaqstan AI-ekonomıkanyń barlyq bes deńgeıin damytýdy kózdeıtinin jazǵanbyz.
