Qazaqstan Ortalyq Azııada «jumsaq kúsh» jahandyq reıtınginde kósh bastady
ASTANA. KAZINNFORM – Qazaqstan Global Soft Power Index jahandyq reıtınginde pozıtsııasyn jaqsartyp, 87- orynnan 82-orynǵa kóterildi.
Zertteý derekterine sáıkes, Qazaqstannyń kórsetkishi 35,9 baldy qurady. Bul ótken jylmen salystyrǵanda 0,8 balǵa joǵary.
Atalǵan reıtıng elderdiń «jumsaq kúshin» baǵalaıdy, ıaǵnı memleketterdiń áskerı kúsh nemese ekonomıkalyq qysym emes, mádenıeti, bıznesi jáne dıplomatııalyq yqpaly arqyly basqa elderge áser etý qabiletin anyqtaıdy.
Indeks álemniń 100-den astam elinde júrgizilgen saýalnamaǵa qatysqan 150 myńnan astam respondenttiń pikirine negizdelgen. Zertteý barysynda eldiń tanymaldylyǵy, halyqaralyq bedeli jáne jahandyq yqpaly baǵalanady. Sonymen qatar memleketterdiń ınvestıtsııa, saýda, talantty mamandar men týrıster tartý múmkindigi de eskeriledi.
Reıtıngke BUU – ǵa múshe barlyq 193 memleket engizilgen.
Jalpy tizimde Qazaqstan Ortalyq Azııa elderiniń ishinde eń joǵary orynǵa ıe boldy. Máselen, Ózbekstan 92-orynǵa (34,5 ball), Tájikstan 129-orynǵa (31,0 ball), Túrikmenstan 138-orynǵa (30,2 ball), al Qyrǵyzstan 142-orynǵa (29,8 ball) ornalasty.
Reıtıngtiń alǵashqy bestigine AQSh (74,9 ball), Qytaı (73,5), Japonııa (70,6), Ulybrıtanııa (69,2) jáne Germanııa (67,7) kirdi. Al alǵashqy ondyqty Frantsııa, Shveıtsarııa, Kanada, Italııa, BAÁ tolyqtyrdy.
Aıta keteıik, Astanada Qazaqstan Respýblıkasy Prezıdentiniń Teleradıokesheni «Dara» prezıdenttik bastamalar qorynyń qoldaýymen uıymdastyrǵan Silk Power atty is-shara ótken edi.
Kazinform halyqaralyq aqparat agenttigine 105 jyl boldy.
