Qazaqstan Ortalyq Azııada náreste óliminiń eń tómen kórsetkishine qol jetkizdi
ASTANA. KAZINFORM- Qazaqstan Ortalyq Azııa elderi arasynda jańa týǵan náresteler óliminiń eń tómen kórsetkishine qol jetkizdi. Qazirgi tańda tiri týǵan árbir 1 000 nárestege shaqqanda 3 ólim jaǵdaıy tirkeledi. Sonymen qatar elimiz BUU-nyń balalar ólimin azaıtýǵa qatysty Turaqty damý maqsattaryn merziminen buryn oryndady.
QR Densaýlyq saqtaý mınıstrligi baspasóz qyzmetiniń habarlaýynsha, medıtsınalyq kómektiń qoljetimdiligin odan ári arttyrý úshin Qazaqstanda 16 jańa balalar aýrýhanasy men perınataldyq ortalyq salý josparlanyp otyr.
Jańa týǵan náresteler óliminiń tómendeýine perınataldyq kómekti júıeli túrde damytý, zamanaýı tehnologııalardy engizý jáne ana men balaǵa medıtsınalyq kómek kórsetý júıesin jetildirý yqpal etti.
Búginde dene salmaǵy óte tómen bolyp týǵan nárestelerdiń ómir súrý kórsetkishi 57%-dy quraıdy. Aldaǵy ýaqytta bul kórsetkishti arttyrý, mamandandyrylǵan kómekti damytý jáne medıtsınalyq uıymdardyń materıaldyq-tehnıkalyq bazasyn nyǵaıtý baǵytyndaǵy jumystar jalǵasady.
Týa bitken aýrýlardy erte anyqtaýǵa jáne júktilik kezinde medıtsınalyq baqylaýdy qamtamasyz etýge de erekshe nazar aýdarylyp otyr.
«Analar saýlyǵy» baǵdarlamasy aıasynda uryqtyń saýlyǵyn saqtaý ortalyqtarynyń 22-sinde bir kúndik klınıkalar ashylyp, dıagnostıka men qursaqishilik emdeýdiń zamanaýı ádisteri engizildi.
Nátıjesinde týa bitken damý kemistikterin anyqtaý kórsetkishi 12%-ǵa artyp, osy sebepterge baılanysty náreste ólimi 15%-ǵa tómendedi.
Aldaǵy ýaqytta ana men bala densaýlyǵyn saqtaý qyzmetin damytý medıtsınalyq kómektiń sapasyn arttyrýǵa, qaýip-qaterlerdi erte anyqtaýǵa jáne Qazaqstannyń barlyq óńirinde zamanaýı dıagnostıka men emdeý ádisteriniń qoljetimdiligin qamtamasyz etýge baǵyttalady.
Aıta keteıik, osyǵan deıin habarlaǵanamyzdaı, elimizde ana ólimi 6,7 ese, náreste ólimi 5,2 ese azaıdy.
