Qazaqstan Ortalyq Azııada badmıntondy damytý boıynsha basym elge aınalady
ASTANA. KAZINFORM – Astanada Qazaqstan sport qaýymdastyǵynyń ókilderi Badminton Asia jáne Qazaqstan badmınton federatsııasynyń basshylyǵymen kezdesý ótkizdi.
QR UOK málimetinshe, taraptar Azııa badmınton federatsııasynyń damý jónindegi komıtetiniń jetekshisi Vadjıd Alı Chaýdrımen elimizde badmıntondy damytý perspektıvalaryn jáne halyqaralyq yntymaqtastyqty nyǵaıtý máselelerin talqylady.
Kezdesýge Qazaqstan Ulttyq Olımpıadalyq komıtetiniń bas dırektory Nurlan Nógerbek, Qazaqstan badmınton federatsııasynyń bas hatshysy Beket Balyqov jáne atqarýshy dırektor Eldos Ómirhan qatysty.
Azııa federatsııasy Qazaqstan Ortalyq Azııada badmıntondy damytý baǵytyndaǵy basym elderdiń biri bolatynyn atap ótti.
Sondaı-aq sporttyń osy túrin júıeli túrde damytýǵa, mamandar áleýetin arttyrýǵa jáne qazaqstandyq sportshylardyń halyqaralyq deńgeıdegi básekege qabilettiligin kúsheıtýge basty nazar aýdarylady. Aıta keteıik, buǵan deıin Badminton Asia Ózbekstan men Qyrǵyzstanda da damý baǵdarlamalaryn tabysty júzege asyrǵan.
Kezdesý barysynda Olımpıada oıyndaryna irikteý kezeńi de keńinen sóz boldy. Vadjıd Alı Chaýdrı qazirgi irikteý júıesiniń asa kúrdeli ekenin jetkizdi: álemdik deńgeıde nebári 25 olımpıadalyq joldama qarastyrylǵan. Sondyqtan sportshylardan joǵary daıyndyq, turaqty nátıje jáne úlken jaýapkershilik talap etiledi. Aldaǵy ýaqytta buqaralyq sportty damytýǵa jáne balalar men jasóspirimder qosalqy quramyn jasaqtaýǵa basymdyq beriledi.
Yntymaqtastyq aıasyndaǵy mańyzdy bastamalardyń biri - Badminton World Federation Level 1 halyqaralyq jattyqtyrýshylar kýrstaryn iske qosý. Bul oqý baǵdarlamasy Astanada 14 aqpanda bastalady. Kýrstarǵa elimizdiń túrli óńirlerinen 12 maman qatysady. Baǵdarlama halyqaralyq biryńǵaı daıyndyq standarttaryn engizýge jáne ulttyq deńgeıde jattyqtyrý ádistemesin jetildirýge múmkindik beredi.
Sonymen qatar bilim berý júıesindegi sporttyq ınfraqurylymdy keńeıtý jáne badmıntondy mektepter men joǵary oqý oryndarynyń baǵdarlamalaryna engizý josparlanyp otyr.
– Qazaqstan úshin halyqaralyq yntymaqtastyq – sportshylarymyzdyń básekege qabilettiligin arttyrýdyń mańyzdy quraly. Zamanaýı daıyndyq ádistemeleri men bilim berý baǵdarlamalaryna qol jetkizý badmıntonnyń barlyq deńgeıde turaqty damýyn qamtamasyz etedi, - dep atap ótti Qazaqstan UOK.
Kezdesý sońynda taraptar uzaq merzimdi strategııalyq seriktestik ornatýǵa jáne Badminton Asia baǵdarlamalaryn júıeli túrde júzege asyrýǵa daıyn ekenin rastady. Bul bastamalar qazaqstandyq sportshylardy halyqaralyq arenada qoldaýǵa jáne olardyń jetistikterin arttyrýǵa baǵyttalǵan.
Aıta keteıik, Italııada ótip jatqan XXV qysqy Olımpıada oıyndarynda qazaqstandyq mánerlep syrǵanaýshy Mıhaıl Shaıdorov qysqa baǵdarlama qorytyndysy boıynsha besinshi orynǵa taban tiredi. Konkımen mánerlep syrǵanaýdan ulttyq qurama basshysy Aıza Mámbekova sportshynyń kórsetkishi men erkin baǵdarlamadaǵy basty basymdyqtary týraly aıtyp berdi.