Qazaqstan Ortalyq Azııada avıatsııalyq qaýipsizdik boıynsha kósh bastap tur

Bul týraly Astanada alǵash ret ótip jatqan Halyqaralyq azamattyq avıatsııa uıymynyń (IKAO) avıatsııalyq qaýipsizdik aptalyǵynda aıtyldy.

IKAO halyqaralyq azamattyq avıatsııa standarttaryn ázirlep, ushý qaýipsizdigin qamtamasyz etýge atsalysady. Qazir uıymǵa 193 memleket múshe. Al elimiz IKAO-ǵa 1992 jyly qosyldy.

Uıymnyń Bas hatshysy Hýan Karlos Salasardyń aıtýynsha, bıyl Qazaqstan IKAO Keńesiniń quramyna kirýge nıetti.

— Bıyl IKAO Assambleıasynda Keńes quramyna tórt jańa múshe saılanady. Qazaqstan Keńes quramyna kirýge nıetti jáne osy baǵytta belsendi jumys júrgizip keledi. Qazaqstan avıatsııalyq qaýipsizdik talaptaryn oryndaý deńgeıi joǵary elderdiń qatarynda. Halyqaralyq standarttardy saqtaý eldiń óńirlik júk jáne jolaýshylar tasymaly habyna aınalýyna múmkindik beredi, — dedi Hýan Karlos Salasar.

Onyń sózinshe, Qazaqstan úshin taǵy bir mańyzdy mindet — bilikti mamandar daıarlaý. Óıtkeni avıatsııalyq qaýipsizdik qyzmetkerlerdiń bilimi men kásibı daıarlyǵyna tikeleı baılanysty.

Halyqaralyq is-shara avıatsııalyq qaýipsizdik pen kıberqaýipsizdiktiń ózekti máselelerine arnalǵan.

Jıynǵa álemniń onnan astam elinen avıatsııa salasynyń ókilderi men halyqaralyq uıymdardyń basshylary qatysyp jatyr.

— Qazaqstan IKAO standarttary men usynymdaryn saqtaıdy. Qazir uıymmen birlesip, 2050 jylǵa deıingi azamattyq avıatsııany damytý jónindegi bas jospar ázirlenip jatyr. Sonymen qatar halyqaralyq áýe qatynasy keńeıip keledi. Qytaı jáne Túrkııamen reıster sany eki ese artty. Qazaqstan ashyq aspan saıasatyn ustanyp, halyqaralyq seriktestermen yntymaqtastyqty damytýǵa daıyn, — dedi QR Kólik mınıstri Nurlan Saýranbaev.

Jıynda tsıfrlyq tehnologııalar men jasandy ıntellektiniń damýyna baılanysty týyndaıtyn táýekelder, kıberqaýipterdiń kóbeıýi jáne ushqyshsyz ushý apparattarynyń taralýy talqylanady.

Hýan Karlos Salasardyń aıtýynsha, jasandy ıntellekt azamattyq avıatsııada da keńinen qoldanyla bastady.

— Jasandy ıntellekt derekterge súıenip, jedel sheshim qabyldaýǵa kómektesedi. Alaıda avıatsııalyq qaýipsizdikke jańa qaterler de týdyrýy múmkin. Sondyqtan bul másele osy aptadaǵy talqylaýdyń negizgi taqyryptarynyń biri bolady, - dedi Hýan Karlos Salasar.

Onyń sózinshe, aldaǵy ýaqytta jasandy ıntellekt jolaýshylardy, júkter men bagajdy tekserý tıimdiligin arttyrýǵa múmkindik beredi. Bul óz kezeginde avıatsııalyq qaýipsizdik mamandarynyń jumysyn jeńildetedi.

Aıta keteıik, avıatsııalyq qaýipsizdik aptalyǵy 2001 jyldan beri álemniń túrli elderinde ótkizilip keledi. Bıyl Qazaqstan halyqaralyq is-sharany alǵash ret qabyldap otyr.

Eske sala keteıik, jaqynda Kólik mınıstrliginiń Azamattyq avıatsııa komıtetiniń tóraǵasy Saltanat Tompıeva IKAO-nyń Ǵalamdyq elshiler baǵdarlamasy aıasynda elshi bolyp taǵaıyndaldy.