Qazaqstan — Ortalyq Azııada analardy áleýmettik qoldaý deńgeıi eń joǵary elderdiń biri
ASTANA. KAZINFORM — Qazaqstan — búginde Ortalyq Azııa elderi arasynda analardy áleýmettik qorǵaý deńgeıi joǵary memleketterdiń biri. Elimizde júktilikke jáne bosanýǵa baılanysty tólenetin áleýmettik tólemniń eń joǵary mólsheri 2 mıllıon teńgeden asady. Bul qoldaý sharasy resmı jumyspen qamtylýdyń mańyzyn arttyryp, áleýmettik saqtandyrý júıesine qatysýǵa múmkindik beredi. Bul týraly Eńbek jáne halyqty áleýmettik qorǵaý mınıstrligi málim etti.
Qazaqstan Respýblıkasy Eńbek jáne halyqty áleýmettik qorǵaý mınıstrligi «Memlekettik áleýmettik saqtandyrý qory» AQ arqyly áleýmettik tólemderdi taǵaıyndaý júıesin turaqty túrde jetildirip keledi. Áleýmettik tólemderdi taǵaıyndaý protsesi tsıfrlyq tehnologııalar men jasandy ıntellekttiń kómegimen jetildirilýde. Negizgi maqsat — tólemderdiń naqty quqyǵy bar azamattarǵa ádil ári ýaqytyly taǵaıyndalýyn qamtamasyz etý.
— Mindetti áleýmettik saqtandyrý júıesi ádildik pen ózara jaýapkershilik qaǵıdattaryna negizdelgen. Áleýmettik tólemderdiń mólsheri azamattyń resmı eńbek ótiline, tabys deńgeıine jáne áleýmettik aýdarymdarynyń kólemine tikeleı baılanysty. Atalǵan tólemderdiń zańnama talaptaryna sáıkes taǵaıyndalýyn qamtamasyz etý maqsatynda MÁSQ derekterdi baǵalaýdyń zııatkerlik algorıtmderin engizdi. Atalǵan tásil tólemderdiń durys eseptelýin qamtamasyz etip, júıeniń ádildigin kúsheıtedi, — delingen habarlamada.
Jańa avtomattandyrylǵan model QR Eńbek jáne halyqty áleýmettik qorǵaý mınıstrligi men Memlekettik kirister komıtetiniń aqparattyq júıeleriniń derekterin biriktirý arqyly jumys isteıdi. Algorıtmder áleýmettik aýdarymdardyń tarıhyn, tabys deńgeıiniń ózgerýin jáne eńbek qyzmetine qatysty málimetterdi taldaıdy. Sonyń nátıjesinde bolashaq ananyń eńbek ótili men naqty tabysy rastalǵan derekter negizinde áleýmettik tólem mólsheri avtomatty túrde eseptelip, tólemderdi taǵaıyndaý úderisi dálirek bolady.
— Tsıfrlandyrý memlekettik qyzmetti alý úderisin barynsha jeńildetti. Resmı jumysy jáne rastalǵan turaqty tabysy bar áıelderge qujat jınaýdyń nemese memlekettik organdarǵa júginýdiń qajeti joq. Áleýmettik tólem mólsheri avtomatty túrde esepteledi, al ony taǵaıyndaý úshin 1414 biryńǵaı baılanys ortalyǵynan keletin SMS-habarlamaǵa kelisim berý jetkilikti, — dep habarlady vedomstvodan.
Osylaısha, resmı jumyspen qamtylý jáne áleýmettik aýdarymdardy ýaqtyly tóleý júktilik pen bala kútimi kezeńinde memleket tarapynan kórsetiletin áleýmettik qoldaýdy tolyq kólemde alýdyń mańyzdy kepili bolyp qala bermek.
Aıta keteıik, júktilik jáne bosanýǵa baılanysty tólemge ótinishti endi ekinshi deńgeıli bankter arqyly berýge bolady.
