Qazaqstan Ortalyq Azııa jastaryna beretin joǵary bilim kvotasynyń sanyn arttyrady
ASTANA. KAZINFORM – Qazaqstan Ortalyq Azııa elderinen kelip oqıtyn stýdentterge joǵary bilim kvotasynyń sanyn arttyrady. Bul týraly Memleket basshysy Qasym-Jomart Toqaev «Egemen Qazaqstan» gazetine jarııalaǵan «Ortalyq Azııa renessansy: ornyqty damý jáne órkendeý joly» atty maqalasynda málim etti.
«Ortalyq Azııa – álemdegi halqy eń jas óńirdiń biri. Aımaq turǵyndarynyń ortasha jasy – nebári 28,7. BUU-nyń boljamyna súıensek, 2040 jylǵa qaraı azamattarymyzdyń ortasha jasy odan ári tómendep, 28,3-ke jetedi. Bul – Soltústik Amerıka (41,5), Eýropa (46,8), Qytaı (48) sııaqty basqa óńirlerge qatysty boljamdardan áldeqaıda tómen kórsetkish.
Muny bes eldiń de ekonomıkalyq jáne áleýmettik damýyna keń jol ashatyn biregeı básekelik artyqshylyq deýge bolady. Jastar ekonomıka, tehnologııa jáne mádenıet salalaryndaǵy jańarý úderisteriniń qozǵaýshy kúshi bola alady», - deıdi Qasym-Jomart Toqaev.
Sondaı-aq, Prezıdent aımaq elderin jas urpaqqa tyń múmkindikter beretin ortaq qurylymdar qalyptastyrýǵa úndeıdi.
«Qazaqstan joǵary oqý oryndary arasyndaǵy yqpaldastyqty damytý, bir-biriniń aýmaǵynda bilim ordalarynyń fılıaldaryn jáne ortaq fakýltetter ashý isine barynsha qoldaý bildiredi. Biz kórshi elder jastarynyń Qazaqstanda joǵary bilim alýǵa degen umtylysyn joǵary baǵalaımyz jáne olardyń óz ýnıversıtetterimizde oqýyna beriletin kvota sanyn birshama arttyramyz. Búginde Qazaqstannyń joǵary oqý oryndarynda Ortalyq Azııadan kelgen 9 myńǵa jýyq stýdent bilim alyp júr», - dep jazady Memleket basshysy.
