Qazaqstan Ortalyq Azııa ıadrolyq qarýsyz aımaǵyna tóraǵalyq etedi
ASTANA. KAZINFORM – Qazaqstan Respýblıkasy Syrtqy ister mınıstrliginiń ókilderi Ortalyq Azııadaǵy ıAdrolyq qarýdan azat aımaq týraly shartqa (OAıAQAA) qatysýshy memleketterdiń jyl saıynǵy konsýltatıvtik kezdesýine qatysty. Bul týraly SІM baspasóz qyzmeti habarlady.
Kezdesý barysynda 2026 jylǵa arnalǵan shart aıasyndaǵy tóraǵalyq fýnktsııalary Qazaqstanǵa resmı túrde tapsyryldy. Sonymen qatar, taraptar BUU aıasyndaǵy is-qımyldardy úılestirýdi qosa alǵanda, 2025 jylǵy birlesken jumys pen aǵymdaǵy jylǵa arnalǵan josparlardy talqylady.
Qazaqstan delegatsııasy tóraǵa retinde bıylǵy jyldyń mereıli ekenin — Semeı qalasynda qol qoıylǵannan beri 20 jyl (2006 j.) tolyp otyrǵanyna toqtala kele, ıAdrolyq qarýdy taratpaý týraly shart pen ıAdrolyq qarýǵa tyıym salý týraly sharttyń Sholý konferentsııalaryn qosa alǵanda, qarýsyzdaný jáne taratpaý salasyndaǵy negizgi alańdarda tyǵyz ózara is-qımyldyń mańyzdylyǵyn atap ótti.
2026 jyl barysynda Ortalyq Azııa memleketteriniń syrtqy saıası vedomstvolary deńgeıinde birqatar is-sharalar uıymdastyrý josparlanyp otyr.
OAıAQAA týraly shartqa («Semeı sharty») Qazaqstan, Qyrǵyzstan, Tájikstan, Túrikmenstan jáne Ózbekstan 2006 jylǵy 8 qyrkúıekte Semeı qalasynda qol qoıyp, barlyq bes tarap ratıfıkatsııalaǵannan keıin 2009 jylǵy 21 naýryzda kúshine endi.
Semeı shartynyń birqatar biregeı erekshelikteri bar: ol bir kezderi ıadrolyq qarýdy belsendi ornalastyrý jáne synaý úshin polıgon bolǵan jáne áskerı maqsatta ýran qarqyndy óndirilgen aımaqta Soltústik jarty sharda ıadrolyq qarýsyz birinshi aımaqty qurdy. Sonymen qatar basqa uqsas aımaqtardyń ishinde OAıAQAA eki ıadrolyq derjavamen birden eń uzyn qurlyq shekarasynyń bolýymen erekshelenedi.
Aıta ketelik Qazaqstan men Japonııa ıadrolyq energetıka salasynda qandaı jobalarmen aınalysatyny týraly jazǵan edik.