Qazaqstan Ortalyq Azııa úshin negizgi ınvestıtsııalyq tirek bolyp otyr – Eýrazııalyq damý banki
ASTANA. KAZINFORM – Qazaqstan Ortalyq Azııadaǵy barlyq ınvestıtsııalar ósiminiń 55%-yn qamtamasyz etti. Bul Qazaqstannyń óńir úshin negizgi ınvestıtsııalyq tirek ekenin kórsetedi. Bul týraly Eýrazııalyq damý bankiniń ıntegratsııalyq zertteýler ortalyǵynyń dırektory Aleksandr Zaboev málimdedi.
– Ortalyq Azııadaǵy barlyq ınvestıtsııalar ósiminiń 55%-yn Qazaqstan qamtamasyz etti. Bul Qazaqstannyń óńir úshin tirek el ekenin kórsetedi, – dedi Aleksandr Zaboev.
Onyń aıtýynsha, Qazaqstannyń sheteldik ınvestıtsııalar aǵynynyń negizgi núktesi bolyp tabylatynyn jáne halyqaralyq ınvestorlar úshin jınaqtalǵan joǵary ınvestıtsııalyq tartymdylyqqa ıe ekenin atap ótti.
Aleksandr Zaboev Ortalyq Azııa elderi arasyndaǵy ishki óńirlik saýdanyń da ósip kele jatqanyn aıtty.
– Biz Ortalyq Azııa elderi arasyndaǵy ishki óńirlik saýdanyń ósip kele jatqanyn kórip otyrmyz. Sonymen qatar elder arasyndaǵy tikeleı sheteldik ınvestıtsııalar da artyp keledi, – dedi ol.
Onyń aıtýynsha, Qazaqstannyń basqa elderge ınvestıtsııa salýymen qatar, keri ınvestıtsııalyq aǵyndar da qalyptasyp keledi. Bul úderistiń birjaqty emestigin kórsetedi.
– Ózbekstan birtindep kórshi memleketterge de ınvestıtsııa sala bastady. Qazirdiń ózinde ózbek ınvestıtsııalarynyń Qazaqstan ekonomıkasyna kelip jatqanyn kórip otyrmyz, – dedi bank ókili.
Onyń pikirinshe, bul Ortalyq Azııa elderiniń bir-birine degen senimi artyp kele jatqanyn kórsetedi.
– Bul óńirdegi tikeleı sheteldik ınvestıtsııalar naryǵynyń, onyń ishinde kólemi men basqa da kórsetkishteri turǵysynan qaı baǵytta damyp kele jatqanyn túsiný úshin óte mańyzdy, – dep atap ótti Aleksandr Zaboev.
Aıta keteıik, Prezıdent Úkimetke ekonomıkalyq ósimdi jedeldetý jóninde tapsyrma bergen edi.
