Qazaqstan Ortalyq Azııa men Taıaý Shyǵysta tsıfrlyq valıýta engizýden kósh bastap tur

ASTANA. KAZINFORM – «Tsıfrlyq teńge» jobasyn damytý boıynsha 2025 jyly birneshe baǵytta jumystar josparlanǵan. Bul týraly Qazaqstan Ulttyq bankiniń «Ulttyq tsıfrlyq qarjy ınfraqurylymyn damytý týraly» (UTsQI) jyldyq esebinde jarııalandy.

2024 jyly «Tsıfrlyq teńge» jobasynyń ekinshi kezeńi aıasynda memlekettik jáne baǵdarlamalanatyn tólemderde tsıfrlyq valıýtany paıdalanýdyń jańa stsenarııleri synaqtan ótkizilip, el ekonomıkasyna tolyq kólemde engizý úshin negiz qalandy.

- «Tsıfrlyq teńge» jobasy boıynsha jumys aıasynda 2024 jyly táýelsiz baqylaýshylar joǵary baǵa bergen birqatar eleýli nátıjege qol jetkizildi. Atap aıtqanda, Halyqaralyq valıýta qorynyń málimetine qaraǵanda, Qazaqstan Ortalyq Azııa men Taıaý Shyǵys elderi arasynda ortalyq banktiń tsıfrlyq valıýtasyn engizý máselesinde jetekshi orynǵa ıe boldy. 2024 jyly «Tsıfrlyq teńge» jobasy Currency Research halyqaralyq uıymynyń «Tsıfrlyq valıýtalardy qabyldaýdaǵy kóshbasshylyq» atalymy boıynsha júldesin jeńip aldy, - dep atalyp ótken Ulttyq banki esebinde. 

Bul turǵyda 2024 jylǵy jumystyń negizgi baǵyty – memlekettiń qatysýymen tólemder baǵytyn qamtý. Osy baǵyt aıasynda tsıfrlyq teńge júıesiniń baǵdarlamalaý qasıetterin paıdalana otyryp, 5 stsenarıı iske asyrylyp, keminde 238 mlrd tsıfrlyq teńge shyǵaryldy, sondaı-aq memlekettik aqparattyq júıelermen ıntegratsııalar júrgizildi.

Munymen qosa, Ulttyq bank esebinde 2025 jylǵa arnalǵan «Tsıfrlyq teńge» jobasyn damytý boıynsha birneshe baǵyt josparlanǵany baıandalǵan. 

- Ulttyq tsıfrlyq valıýtany jáne onyń artyqshylyqtaryn tolyqqandy iske asyrý úshin tıisti normatıvtik-quqyqtyq negiz qajet. 2025 jyly 2023 jáne 2024 jylǵy jumystar negizinde aqparattyq tehnologııalar qyzmetiniń zańnamalyq negizin bekitý josparlanǵan... 2025 jylǵa barlyq qatysýshymen tolyq ıntegratsııa jaǵdaıynda tsıfrlyq valıýtadaǵy transshekaralyq tólemderdiń bazalyq stsenarııin testileý josparlanǵan, - dep atalyp ótken UB aqparatynda. 

2025 jyl ulttyq tsıfrlyq valıýtany kezeń-kezeńmen engizý boıynsha sońǵy jyl sanalady. TsT platformasyn paıdalanýǵa engizý osy jospardy oryndap qana qoımaı, ulttyq qarjylyq ınfraqurylymnyń mańyzdy quramdas bóligin qurady. 

Aıta keteıik, Qazaqstanda tsıfrlyq teńgeni 2025 jyldyń sońyna deıin tolyqtaı engizý josparlanyp otyr. 

Osyǵan deıin 2024 jyldyń sońyna deıin tsıfrlyq teńgedegi tranzaktsııa aınalymy 200 mlrd teńgeden asatyny habarlandy.

Byltyr jazda Ulttyq bank tóraǵasy Tımýr Súleımenov memlekettiń satyp alý júıesindegi jemqorlyqqa tsıfrlyq teńge arqyly tosqaýyl qoıý jospary bar ekenin málim etti.