Qazaqstan Ortalyq Azııa elderiniń týrıstik operatorlary tizilimin jasaýdy usyndy

Qazaqstan koreılik saıahatshylar úshin Ortalyq Azııa elderiniń týrıstik operatorlary tizilimin jasaýdy usyndy. Mundaı usynysty «Ortalyq Azııa – Koreıa Respýblıkasy» 16-yntymaqtastyq forýmynda Premer-Mınıstrdiń orynbasary – Syrtqy ister mınıstri Murat Nurtileý jasady, dep habarlaıdy Kazinform tilshisi Ashhabadtan.

«Ortalyq Azııanyń baı tarıhy, ádemi tabıǵaty jáne koreı týrısterin qyzyqtyratyn erekshe kórikti jerleri bar. Sońǵy jyldary Qazaqstan óziniń týrıstik sektoryn damytýǵa 4 mlrd dollardan astam ınvestıtsııa saldy. Álemdik deńgeıdegi taý shańǵysy kýrorttarynyń, qonaq úılerdiń jáne kólik júıesiniń qurylysyn qosa alǵanda, 400-den astam týrıstik nysan paıdalanýǵa berildi. Osy salanyń áleýetin ashý maqsatynda forým hatshylyǵyna Ortalyq Azııa elderine toptyq saparlardy uıymdastyrý úshin týrıstik operatorlar tizilimin qurý máselesin zerdeleýdi usynamyz», - dedi Murat Nurtileý.