Qazaqstan Ortalyq Azııa elderi arasynda halyqaralyq bedeli eń joǵary el dep tanyldy
ASTANA. KAZINFORM — Qazaqstan jahandyq ulttyq bedel ındeksinde Ortalyq Azııa elderi arasynda kósh bastady. CEOWORLD málimeti boıynsha Qazaqstannyń halyqaralyq bedeli óte joǵary baǵalanǵan.
Reıtıngide elimiz Ortalyq Azııa elderi arasynda eń jaqsy nátıjege qol jetkizip, 69-oryn aldy. Oǵan 197 el kiredi.
Reıtıng ádisnamasy 10 negizgi sala men 50 jeke ındıkatordy taldaýǵa negizdelgen. Olarǵa eldiń ekonomıkalyq áleýeti, basqarý tıimdiligi, ishki jáne syrtqy saıasaty, ınvestıtsııalyq tartymdylyǵy, ınnovatsııalyq jáne tehnologııalyq damýy jáne basqa da ındıkatorlar kiredi.
Qorytyndy ball 0-den 100-ge deıingi shkala boıynsha derekterdi biryńǵaı ındıkatorǵa biriktirý arqyly esepteldi, munda 100 — eń joǵary ball.
TMD elderi arasynda Qazaqstan halyqaralyq bedeli boıynsha ekinshi oryn aldy. Eldiń qorytyndy upaıy 66,62 baldy qurady. TMD reıtıngisinde tómengi orynda Belarýs (59,27 upaımen 89-oryn), Armenııa (57,14 upaımen 93-oryn), Ázerbaıjan (54,15 upaımen 101-oryn), Ózbekstan (37,7 upaımen 134-oryn), Qyrǵyzstan (34,87 upaımen 145-oryn) jáne Tájikstan (27,92 upaımen 160-oryn) tur.
— Bul básekege qabilettiliktiń, yqpaldyń jáne órkendeýdiń ólshenetin jáne strategııalyq faktory, — dep atap ótti CEOWORLD.
Zertteý avtorlarynyń aıtýynsha, CEOWORLD 2026 jahandyq bedel ındeksi elderdi reıtıngige qoıyp qana qoımaı, sonymen qatar halyqaralyq yqpal tujyrymdamasynyń qalaı ózgerip jatqanyn kórsetedi. Qazirgi álemde senim, basqarý sapasy, ınnovatsııa jáne eldiń syrtqy seriktestermen turaqty qarym-qatynas ornatý múmkindigi barǵan saıyn mańyzdy bolyp keledi.
Budan buryn Qazaqstan álemdik gastronomııalyq reıtıngiler kartasyna engenin jazdyq.
