Qazaqstan Ortalyq Azııa elderimen kelisimder nátıjesinde kóktemde 11 mlrd tekshe metr sý alady
ASTANA. KAZINFORM - Qazaqstan sáýir aıyna deıin 11 mlrd tekshe metr sý alady. QR Sý resýrstary jáne ırrıgatsııa mınıstri Nurjan Nurjigitov osy jóninde kelisimge keldi.
Dýshanbe qalasynda Ortalyq Azııanyń Memleketaralyq sý sharýashylyǵyn úılestirý komıssııasynyń (MSShÚK) 88-shi otyrysy ótti. Jıynǵa Qazaqstan, Ózbekstan, Tájikstan jáne Túrikmenstan sý sharýashylyǵy vedomstvolarynyń basshylary qatysty.
Taraptar Syrdarııa jáne Ámýdarııa ózenderi basseınderinde vegetatsııaaralyq kezeńniń ótý barysyn qarastyrdy.
Aıta keteıik, kelisilgen sý kólemi Syrdarııa ózeni arqyly Túrkistan oblysynyń Shardara sý qoımasyna keledi. Onyń ishinde 1,6 mlrd tekshe metr sý Aral teńizine jiberiledi.
- Bul bıyl sýarý kezeńi úshin qajet sý kólemin jınaýǵa, sondaı-aq Qazaqstannyń ońtústik oblystaryndaǵy ekojúıeni saqtaý is-sharalaryn júzege asyrýǵa múmkindik beredi. Elimizdiń ońtústigindegi jaǵdaı batys pen soltústikten ózgeshe ekenin atap ótemin. Munda úlken kólemdegi sý tasqyny bolǵan joq. Al jazda sýarmaly sýǵa degen suranys óte joǵary. Sondyqtan da biz ońtústikti sýmen qamtamasyz etý boıynsha múldem basqa jumys júrgizip jatyrmyz. Sý dıplomatııasy – bizdiń mınıstrlik jumysynyń mańyzdy baǵyty. Osy kelissózderdiń nátıjesinde ótken jyly elimizdiń ońtústigin sýmen turaqty qamtamasyz ettik. Biz sý bólý jáne transshekaralyq sý nysandaryn qorǵaý jónindegi barlyq máselelerdi Ortalyq Azııa elderindegi áriptesterimizben birlese otyryp sheshemiz, - dedi Sý resýrstary jáne ırrıgatsııa mınıstri Nurjan Nurjigitov.
Osyǵan deıin elimizdegi sý resýrstary boıynsha aqparattyq júıe ázirlenetini týraly habarladyq.