Qazaqstan Ortalyq Azııa elderimen yntymaqtastyqqa aıryqsha mán bermek
Ortalyq Azııa elderiniń halyqaralyq protsesterdegi strategııalyq róli artyp keledi. Bul týraly QR Syrtqy ister mınıstrliginiń resmı ókili Aıbek Smadııarov jyldyń qorytyndy brıfınginde baıandady, dep habarlaıdy Kazinform.
«Bıyl bizdiń qarym-qatynasymyz túbegeıli jańa deńgeıge kóterildi. 2023 jyly Tájikstan prezıdenti Emomalı Rahmonnyń Qazaqstanǵa memlekettik jáne jumys saparlary ótti. Eki el arasyndaǵy dıplomatııalyq qatynastardyń 30 jyldyǵyna oraı, Odaqtastyq qatynastar týraly deklaratsııaǵa qol qoıylyp, Qazaqstannyń 3 iri qalasynda buryn-sońdy bolmaǵan Tájikstannyń mádenıet kúnderi ótti», - dedi Aıbek Smadııarov QR Syrtqy ister mınıstrliginde.
Ózbekstanmen odaqtastyq qatynastar da tereńdeı túsýde. Naýryz aıynda Ózbekstan prezıdenti Shavkat Mırzıeevtiń Shymkentke jumys sapary ótti. QR Parlamenti Májilisi Tóraǵasynyń Tashkentke resmı saparynda eki eldiń Parlamentaralyq keńesiniń 1-shi otyrysy ótti. Bıyl Qazaq-ózbek memlekettik shekarasyn demarkatsııalaý týraly shart kúshine endi, «Ortalyq Azııa» halyqaralyq ónerkásiptik kooperatsııa ortalyǵynyń qyzmetin retteý týraly úkimetaralyq kelisimge qol qoıyldy.
«Túrikmenstanmen, ásirese saýda, kólik, energetıka, bilim berý jáne mádenıet salalaryndaǵy strategııalyq áriptestikti odan ári keńeıtýge ózara kózqaras rastaldy. Qyrǵyzstanmen dostyq jáne odaqtastyq qatynastary myzǵymas kúıinde qalyp otyr. Bıyl Qyrǵyzstan Prezıdenti Sadyr Japarov Astana halyqaralyq forýmyna qatysty, onda Indýstrııalyq saýda-logıstıkalyq keshen qurý jáne onyń qyzmetin retteý týraly úkimetaralyq kelisimge qol qoıyldy. Qazaqstan men Qyrǵyzstan arasyndaǵy І Óńiraralyq yntymaqtastyq forýmy úkimet basshylarynyń qatysýymen Tarazda ótti», - dedi resmı ókil.
Oń úrdisterdi bekitý maqsatynda QR Syrtqy ister mınıstri Murat Nurtileý Ózbekstan men Túrikmenstanǵa alǵashqy resmı saparlaryn jasady, Tájikstandaǵy Ortalyq Azııa elderiniń syrtqy saıası vedomstvolary basshylarynyń keńesine qatysty.
Birlesken kúsh-jiger arqasynda Ortalyq Azııa memleketteri basshylarynyń konsýltatıvtik kezdesýlerinde besjaqty yntymaqtastyq nyǵaıa túsýde, al osyndaǵy tóraǵalyq Qazaqstanǵa ótken bolatyn. Aqpan aıynda Túrkistanda Ortalyq Azııanyń alǵashqy parlamentaralyq forýmy ótti.
«Ortalyq Azııa bestiginiń halyqaralyq protsesterdegi strategııalyq róli artyp keledi. QHR, AQSh, Eýroodaq, GFR, Parsy shyǵanaǵy arab memleketteriniń yntymaqtastyq keńesimen «OA+» formatyndaǵy asa joǵary deńgeıinde mańyzdy is-sharalar, sondaı-aq RF, AQSh, EQYU, Úndistan jáne Ońtústik Koreıamen mınıstrlik kezdesýler ótti. Memleket basshylary deńgeıinde «OA-EO» óńiraralyq áriptestigin ınstıtýtsııalaý týraly ýaǵdalastyqqa qol jetkizildi. Alǵash ret Ortalyq Azııa elderi men Eýroodaqtyń barlyq 27 múshe eliniń syrtqy ister mınıstrleriniń kezdesýi ótti», - dedi A. Smadııarov.