Qazaqstan ortaq qaýipsizdik úlgisine aınalady

Memleket basshysy jıynda sóılegen sózinde álemdik ekonomıka men saıasattyń ózekti máseleleri jóninde pikir almasýdyń mańyzdylyǵyn atap ótti. Nursultan Nazarbaev álemdik jáne óńirlik máselelerdi sheshýde elimizdiń atqaratyn róline toq­taldy, sonyń ishinde ıadrolyq qarýsyz­daný úderisine belsene qatysyp kele jatqa­nymyzdy aıtty.

Qazaqstan Prezıdenti jalpyálemdik úderisterdiń qarqyn alyp otyrǵanyna, ulttyq, óńirlik jáne jahandyq damý máselelerine qatysty tyń ustanymdar men tásilder qajettigine basa nazar aýdardy.

- Munaı men metall baǵasynyń kúrt tómendeýi, qor naryqtary men ulttyq valıýtalardyń quldyraýy, ózara sanktsııa engizý saıasaty saldarynan álemdik saýda ósiminiń tómendeýi - osynyń bári, árıne, qazirgi zamanǵy jahandyq ekonomıkanyń syn-qaterleri. Biraq bul aıtylǵandardy sheshimi tabylmaıtyn máseleler deýge bolmaıdy. Sol sebepten qazirgi kezeń «salyń sýǵa ketip», qur baıbalam salyp otyratyn ýaqyt emes. Eń aldymen, ekonomıkalyq ósimniń jańa múmkindikterin jáne ózara tıimdi yntymaqtastyqtyń jańa joldaryn taba bilý kerek. Kózimiz kórip, qolymyzben ustap kórmegen jańa nárselerden úrký sezimi damý men progress jolynda erik-jigerimizdi jasytyp, saǵymyzdy syndyrmaýy kerek, - dedi Nursultan Nazarbaev.

Memleket basshysy geosaıası teketires­terdiń, qarama-qaıshylyqtardyń kúsheıýi memleketter arasyndaǵy senimge syzat túsiretinin, jahandyq jáne óńirlik qaýip­sizdikti joqqa shyǵaratynyn atap ótti. Sonymen birge, bul faktor qazirgi zamanǵy ótkir máselelerdiń sheshimin budan da belsendirek izdestirýge túrtki bolady.
Nursultan Nazarbaev sondaı-aq Eýrazııa­lyq ekonomıkalyq odaq pen Eýropa­lyq odaq yntymaqtastyǵynyń perspek­tıvasyna qatysýshylar nazaryn aýdardy.

- Barlyǵy úshin tıimdi «Úlken Eýrazııa» birtutas ekonomıkalyq keńistigin qurý baǵdaryn birlese otyryp aıqyndaý mańyzdy. Menińshe, mundaı perspektıva sózsiz aldymyzdan shyǵady. Shanhaı yntymaqtastyq uıymy, Eýrazııalyq ekonomıkalyq odaq, Eýropalyq Odaq jáne «Jańa Jibek joly ekonomıkalyq beldeýi» jobasy, keleshekte búkil Azııa-Tynyq muhıty qoǵamdastyǵy birlesip, ózara tyǵyz is-qımyl jasaýy qajet. Qurlyqtyq ári álemdik damýdyń bul baǵytyn moıyndamaý búginde Eýrazııa halqynyń ilgerileýine, ál-aýqatyna jáne qaýipsizdigine zııanyn tıgizbeı qoımaıdy. Bul - meniń túbegeıli ustanymym, - dedi Memleket basshysy.

Qazaqstan Prezıdenti qalyptasyp kele jatqan iri óńirlik birlestikter, sonyń ishinde Transatlantıkalyq saýda jáne ınvestıtsııalyq keńistik, Transtynyqmuhıt keńistigi, Barlyǵyn tegis qamtıtyn óńirlik ekonomıkalyq keńistik tárizdi jobalar saýda men yntymaqtastyqtyń birtutas eýrazııalyq keńistigin qurýǵa baǵyttalýǵa tıis ekenin atap ótti.

Budan bólek, Memleket basshysy ádilettilik, senimdilik, yntymaqtastyq jáne jalpyǵa ortaq jaýapkershilik qaǵıdattaryna negizdelgen álem qalyptastyrý jónindegi mindetterdiń ózektiligine toqtaldy.

- Qazaqstan Ortalyq Azııa óńirindegi Batys pen Shyǵys arasyndaǵy, Soltústik pen Ońtústik arasyndaǵy ekijaqty qozǵalystyń myqty dánekeri bolýdy óziniń mıssııasy retinde kóredi. Ol ózara is-qımyl men yntymaqtastyqtyń, beıbitshilik, senim jáne jalpyǵa ortaq qaýipsizdiktiń úlgisine aınalatyn aýmaq bolýǵa tıis. Munyń da ózindik problemalary jetkilikti. Álem dıalog pen kelissózderdiń áleýetin paıdalaný arqyly kez kelgen máseleni sheshe alady, sóıtip qarama-qaıshylyqty joıyp, XXI ǵasyrǵa arnalǵan jahandyq damýdyń ortaq strategııasyn ázirleıdi dep senemin, - dedi Nursultan Nazarbaev.

Sondaı-aq, Qazaqstan Prezıdenti Qytaı, Reseı, AQSh, Aýǵanstan, Japonııa sarapshy­larynyń ShYU-ny odan ári damytý perspektı­vasyna, Jibek jolyn qaıta jańǵyrtý jó­nin­degi sharalarǵa, ıadrolyq qarýsyzdanýǵa, óńir­lik yntymaqtastyqqa, ekonomıkany árta­rap­­tandyrýǵa qatysty birqatar saýaldarǵa jaýap berdi.
Sońynda Memleket basshysy jahandyq jáne óńirlik máselelerdi retteýge qatysty muqııat ázirlengen sheshimderdiń mańyzdylyǵyn arttyrý qajettigin aıtyp, Astana klýbynyń ekinshi otyrysyna qatysýshylardyń syndarly, mazmundy suhbat ótkizýlerine tilektestik bildirdi.